-القاعدة الاولى: حياتك تُشكل على حسب ما تريد، حياتك كما تراها انت لا كما يراها الاخرون!اعتبر حياتك دى لوحة بترسمها، و بتشكلّها .. و انت بترسم اكيد هتغلط .. بس مش هتقعد تسأل لية انا غلط؟ على طول هتروح ماسك استيكة و ماسح الغلط .. و هو دة بالظبط اللى المفروض تعمله مع الحياة.
ماتضيعش وقتك و تهدر تفكيرك على حاجات عدت و اخطاء حصلت .. امسح اخطائك بأيدك و غيرها و بدلها و حسن شكلها .. حياتك قبل الميلاد مش عارفها .. و بعد الممات مش عارفها .. حياتك دى بس اللى انت عايشها و عارفها .. ماتضيعهاش على الفاضى!
حياتك ما بين الوقت اللى استلمت الروح من الله و ما بين الوقت اللى هترضهاله فيه .. حاول بقى ماتضيعش ولا لحظة من الوقت دة لأنك مش عارف مدته .. كل يوم قدامك فرصة .. متسبهاش تعدى منك!
-القاعدة الثانية: اتبع النجوم المضيئة، تجد دربك الذى خُلقت لأجله.
لو واقف فى مكان ضلمة .. اتحرك .. حتى لو هتخبط فى الف حيطة و سور .. اتحرك .. ماتفضلش واقف و تسيب نفسك للظروف .. اخلق انت الظروف و اسعى.
طول ما انت واقف فى مكانك مش شايف النجوم .. مش هتجيلك و مش هتتحرك .. دور انت بنفسك عليها .. و اول ماتلاقيها ماتسيبهاش لأنها هى اللى هتدلّك على الطريق .. النجوم دى هتكون مكافأة ربنا ليك علشان سعيت .. مشيت و غيرت مكانك.
النجوم دول ممكن يكونوا اشخاص تقابلهم فى حياتك .. تسمع عنهم فى حكايات .. تقرأ عنهم فى كتاب .. مش هتفرق المهم لما تلاقيهم افضل وراهم .. هتوصل لحلمك.
-القاعدة الثالثة: الكم ليس اهم من الكيف، ليست السعادة بالعدد و الارقام، اسعد الكائنات اطفال لا يمتلكون اى شئ!
لو كانوا سألونى و قالوا ليا اتمنى .. كنت قُلت عايز فلوس كتير .. و بيت كبير .. و عربية اخر موديل .. و احلى واحدة فى العالم اتجوزها .. و خدم كتير .. و شكل حلو جميل!
لكن لما ربنا حب يورينى ان السعادة مش بالكم .. لقيت السعادة فأبسط الحاجات اللى موجودة فى حياتى .. فى منها اتوجد لما بصيت حواليّه .. و فى منها كان موجود اصلًا و انا كنت مُهملة بحجة انه مش كفاية.
مش دايمًا السعادة فى الحاجة الكتير .. ممكن ابسط الاشياء تكون هى اكتر الاشياء سعادة بالنسبة لك .. كلمة حلوة من حد بتحبه .. ابتسامة رضى من امك و دعاء جميل ليك .. خروجة فى مكان بسيط مع اصحابك اللى بتحبهم .. نظرة و ابتسامة من طفل صغير .. حاجات كتير .. بس انت دوّر على اللى بيفرحك و اعمله .. طالما انت راضى عنه و عارف ان ربنا راضى عنه اعمله .. و ماتخفش و ماتفكرش.
على رأى الست نانسى "انكش ع الفرحة بمُنكاش".
- القاعدة الرابعة: مهما عَلَى تفكير الانسان فلن يصل إلى تدبير الله.
اكيد كتير بتقعد مع نفسك و تقول "ياة لو كنت عملت كذا .. ياة لو كنت قُلت كذا .. ياة لو عندى كذا" .. كل اللى بتفكر فيه دة كان ممكن بس ربنا منعه عنك لسبب ما .. اية هو؟ هو اعلم!
بس اللى انا اعرفه انك ابتديت تفكر كدة علشان انت شايف اللى انت فيه مش كفاية .. محدش راضى عن نفسه و محدش عاجبة حالة .. و دة بيكون سبب ان الناس تتغير و متفضلش واقفة فى نفس المكان .. بس برضه حاول تبص حواليك يمكن تلاقى حاجات حلوة كتير مكنتش واخد بالك منها .. مش هتخسر حاجة بص بصة .. خد فكرة عن اللى انت مش شايفة فى حياتك يمكن دة يساعدك اكتر على التغير .. و يساعدك على الوصل للحاجات اللى انت عايز توصلها.
-القاعدة الخامسة: لا تسبق حلمك!
متروحش تشترى اسطوانات كتير من قبل ما تشترى البلاى ستيشن مثلًا .. متروحش تشترى الشاشة من قبل ما تشترى الكمبيوتر .. خلى كل حاجة تمشى بترتيب!
اسعى ورا حلمك .. ارسمله خطوات .. و متسبقش حلمك ولا تسبق الخطوات .. انت مستعجل لية؟ هو حلمك دة بيجرى مثلًا؟
متنساش بس تحدد حلمك الاول و تحدد انت عايز اية .. ماتفضلش ماشى كدة وخلاص .. حدد حلمك و ارسمله الخطوات هتوصل!
____________________________________
الكلام دة مش كلام كُتب تنمية بشرية .. دى حاجة حصلت و بتحصل ليا و لناس غيرى كتير .. اعتبرها تجربة ذاتية بيقدمهالك واحد قدك يمكن او اصغر .. و اتعامل مع الكلام على انه كلام فى قعدة على قهوة مثلًا .. اعتبره نصيحة .. او زى ما تحب تشوفه شوفه .. و اكتب لنفسك .. اكتب كلامك انت بأيدك .. و ارجع لكلامك دة بعد سنة او اتنين .. و شوف اية اللى اتغير .. و لو مأتغيّرش حاجة .. قطع الورقة و ادخل نام عادى كأنك مكتبتش حاجة .. و اصحى تانى يوم اكتب واحد تانية .. و هكذا بقى ....
No comments:
Post a Comment