عمرك شُفت الزهرة منعت اذى عن نفسها بالشوك؟ الشوك مجرد شكل علشان بس توحى انها ممكن تدافع عن نفسها، متخليش نفسك شكل من بره و فاضى من جوه .. خلى استخدام عقلك اهم من استخدام عضلاتك.
-ليس صحيحًا ان العيون تُدرك كل شئ، الكثير منّا يملكون العيون و لكنهم لا يبصرون.
فى ناس تكون شايفة الحقيقة واضحة و تنكرها، اصبحنا بنشوف ناس بتزوّر الحقيقة فقط لمصالح شخصية، و يمكن كما تزوّير الحقيقة دة يضر بالمجتمع كله بما فيهم الناس اللى بيزوّروا الحقيقة .. فحاول تركز فى كل اللى بتشوفه و تسأل عن كل اللى بتسمعه .. مفيش حاجة مضمونة فى الزمن دة يا ابنى *كآبة و كدة*.
-اذا زادت كآبتك احببت ان ترى الغروب، و اذا زاد تفاؤلك احببت ان ترى الشروق.
كل ما تكون كئيب اكتر كل ما تحب تشوف الحاجات اللى بتخلص، متحبش تشوف حاجة بتبدأ .. كل لما تشوف حاجة بتبدأ تفكرك انك ممكن تبدأ من جديد و تنسى كآبتك دى.
و ساعات احنا اللى نصنع الكآبة بنفسنا .. لما تفضل قاعد حابس نفسك بين اربع حيطان لا ترد على حد ولا تكلم حد ولا تخرج مع حد و تنام تقوم تاكل و تشرب و تنام تانى و كأن الحياة وقفت على يوم واحد من الزمن و فضلت تعيد فيه .. غير فى احداث يومك و اعمل حاجة جديدة او حتى قديمة بس بتفرحك لو حاسس انّك بتكآب نفسك بنفسك!
-اذا اردت رؤية الفراشات، فلابد لى من جيرة بعض الديدان.
زى ما بتشوف الحاجة الحلوة لازم تشوف الحاجة الوحشة .. الدنيا مش كلها سعادة ولا كلها حزن .. بس انت بأيدك تصنع السعادة زى ما انت برضه اللى بتصنع الحزن .. ربنا جعل ليك سبب فى كل شئ انت بتعمله .. دور ورا الاسباب و انت تعرف.
حد كان يصدق ان دودة تبقى فراشة؟ اسعد نفسك :)
-لماذا تشرب؟ *قالها للسكير*
فقال: اشرب لأنسى عارى
فسأل: و اى عار هذا؟
فرد: عار الشرب.
متصلحش خطأ بخطأ اكبر .. حاول لما تصلح الخطأ تخلى بالك لتغلط تانى .. فكر قبل ما تصلح هتبدأ خطوة الاصلاح منين؟
-لا تمتلك اكثر مما تريد، ولا تمتلك ما لا تحتاج.
انّك يكون عندك اكتر من حاجتك هيعملك نوع من الفتور فى الامتلاك لأى حاجة بعد كدة .. و هتحس انك مش لاقى حاجة ممكن تكون نقصاك و تمل و تكتئب .. النقص فى الانسان بيخليه دائمًا يسعى نحو الكمال.
-ان الحياة ليست مجموعة من الاوامر و النواهى.
ممكن حد يقلش و يقولك "اة علشان كدة مبتنزلش بكتالوج" و ها ها ها و لطافه .. بس الحقيقة هى كدة فعلًا .. علشان هى مش مجموعة اوامر تدوس على زرار تحصل حاجة .. هى اشبه بامتحان او رحلة .. بتجرب فيها على قد ما تقدر قبل ما تنتهى الرحلة مش اكتر ولا اقل.
بس نصيحة .. متخليش حد يبوظ عليك الرحلة!
-انت لا تحكم الا على ما ترى من الاشياء.
لو بتنزل فى اى شارع من شوارع مصر من الساعة 3 بعد نص الليل للساعة 6 الصبح هتقول "ياااة ازاى البلد دى فاضية و هادية بالشكل دة" *دة طبعًا فى غير اوقات الاعياد الرسمية و الغير رسمية*!
اما لو بتنزل من الساعة 2 الضهر لحد 2 بليل .. هستب و تشتم فى كل حاجة فى البلد كل 20 متر مثلًا تمشيهم .. بأنت بتحكم على الحاجة على حسب ما انت شايفها .. يعنى اللى اتولد عاش طول حياته فى الصحراء .. لو محدش قاله ان فى حاجة اسمها مدينة هيفتكر ان الكرة الارضية كلها عبارة عن صحراء!
حاول على قد ما تقدر متحكمش على حاجة او على انسان اللى لما تعرف عنه كتير .. حكمك الابتدائى او المسبق على الاشياء مش دايمًا صح .. و برضه يعنى للطرف التانى .. حاول يعنى على قد ما تقدر تخفى عيوبك متفرحش بيها .. مش حاجة حلوة والله صدقنى!
كفاية كدة قُصاصات .. و لحد ما افكر فى قُصاصات تانى .. سلام!
No comments:
Post a Comment