هل الشيطان هو اخر خط دفاع لله؟ :)
بسم الله الرحمن الرحيم .. بعد الصلاة و السلام على خير الانام رسول الله محمد ...
عمرك قعدت مع نفسك و فكرت هو لية ربنا خلق الشيطان اصلًا؟ طيب لو مكانش الشيطان موجود كان اية اللى هيحصل؟
(فَأَزَلَّهُمَا الشَّيْطَانُ عَنْهَا فَأَخْرَجَهُمَا مِمَّا كَانَا فِيهِ ۖ وَقُلْنَا اهْبِطُوا بَعْضُكُمْ لِبَعْضٍ عَدُوٌّ ۖ وَلَكُمْ فِي الْأَرْضِ مُسْتَقَرٌّ وَمَتَاعٌ إِلَىٰ حِينٍ (36) البقرة)
من اول خلق سيدنا آدم و الشيطان راكب دماغة و معانِد مع الله علشان فضل عليه ادم اللى خلقه ربنا من طين و كان خلق الشيطان من نار، و الشيطان بالنسبة له ان الطين اقل من النار و انا الاحق و حاجات كدة ...
مؤمن بأن الله خلقه و خلق ادم، لكن مش مؤمن بأن الله عدل ما بينهم، شايف انه اتظلم، عاند و تحدى ربنا، هنا بقى ممكن حد يقول ان ربنا خلقه اصلًا لمهمة محددة فكان لازم يعمل كدة، و دة صح انه فعلًا كان مصيرة فى الاخر هينزل الارض مع الانسان علشان يحاول يغويه و يبعدوا عن طريق ربنا ...
تخيلوا كدة بقى لو الشيطان كان سجد عادى جداً زيه زى الملائكة كلهم؟! تقريباً الدنيا مكانش هيكون ليها وجود، الشيطان خلقه كان مهم زيه زى النفس البشرية الاماره بالسوء اللى لو مزكيتهاش و حاولت تنقيها هتكون هى المُسيطرة عليك!
كان الدكتور مصطفى محمود كتب مره انه لو كان ربنا مخلقش الشيطان كانت الناس هتعمله بنفسها لأن دايماً الانسان بيحاول يرمى الغلط على غيره حتى لو هو اللى غلط، انا مبقولش ان الشيطان برئ، بس احنا اللى بنمهدله الطريق دايماً، ربنا بيقول فى القرآن "إِنَّ كَيْدَ الشَّيْطَانِ كَانَ ضَعِيفاً" .. بس ضعيف على مين بقى؟ على المؤمن اللى بيحاولوا يزكوا انفسهم من الحقد و كل الصفات اللى مش كويسة .. و كيد الشيطان عظيم على اللى خاضع و مستسلمله طول الوقت ...
الشيطان مش نازل يشيل عن الله هجوم البشر على اى حاجة بتحصل فى حياتهم، ربنا قايل ان الخير من عنده و الشر من عنده فأحمدوه فى الحالتين، و نحاول نبص لنفسنا بدل ما ندور على حد نرمى عليه كل حاجة تحصل فى حياتنا مش عاجبانا!
توفيق الحكيم كان كتب ان احنا بنشوف نور ربنا من خلال ظلام الشيطان، يعنى بنفرق و نعرف الخير لما بنشوف الشر، و هى دى فكرة وجود الشر فى العالم، ان الناس تعرف تفرق بينه و بين الخير و تحاول تصلح من نفسها و تعمل الخير اكتر ...
وجود الشيطان ضرورى فى حياتنا، من غيره مكانش هيكون فى دنيا ولا حساب ولا عقاب ولا اى حاجة خالص، زيه زى الانسان، بأرادة الله طبعاً قبل كل حاجة اتوجدوا على الارض لمهمة و هما بيأدوها من ملايين السنين، اينعم الشيطان تفوق فى اخر كام الف سنة لكن دة ميمنعش برضه اننا نحاول انه ميتغلبش علينا!
ابليس دلوقتى بقى ليه اتباع من الانس ماشين بينفذه خطته احسن من تنفيذ اتباعه نفسهم! :)
تزكية النفس هى الطريقة الوحيدة اللى ممكن نتغلب بيها على ابليس، جرب كدة تصحى من النوم فرحان مش كاره حد مش مضايق من حاجة مفيش حقد من اى نوع على حد، انا عارف والله انها حاجة صعبة بس نحاول يعنى .. نحاول!
No comments:
Post a Comment