قد مات احفاد هابيل كلهم، و لم يبقى على الارض الا احفاد قابيل، فعندما بسط قابيل يده ليقتل بها هابيل قال هابيل "لَئِنْ بَسَطتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِي إِلَيْكَ لأَقْتُلَكَ إِنِّي أَخَافُ اللَّهَ رَبَّ الْعَالَمِينَ" - سورة المائدة 28
بسم الله الرحمن الرحيم، بعد الصلاة و السلام على الرسول الكريم :)
تقريباً كلنا عارفين قصة قابيل و هابيل و ان قابيل قتل هابيل و كدة، بس قتله لية بقى؟ و هل كان فى حل غير القتل ممكن يعمله؟
بأختصار قابيل قتل هابيل بسبب الغيرة و الحقد، هابيل كان طول عمره هادئ و بيحب كل اللى حواليه و طباعه كويسة، اما قابيل فكان طباعه حادة جداً، فكان شغل قابيل فى الزراعة طبيعى لأن الزراعة مش محتاجة حنّية اصلًا، اما هابيل فأشتغل راعى للغنم و الماشية علشان هما حيوانات بيحسوا برضه فعايزين شوية عطف .. اة بيحسوا اُمال اية!
السيدة حواء ولدت بنت توأم مع هابيل و بنت توأم مع قابيل، علشان هابيل نيته صافية جات التوأم بتاعته مش حلوة و توأم قابيل هى اللى حلوة و هى اللى ينفع يتجوزها، الفكرة هنا بقى مش اوبا يا ابن الاية يا محظوظ و الكلام دة، هو كان طيب استحق واحدة حلوة، قابيل مكانش طيب استحق واحدة على قدر شره ...
طبعاً قابيل مسكتش، قال دة ظلم و اعترض، قام سيدنا آدم قالهم قدموا قربان لله كل واحد من اللى بيرعاه و اللى بيزرعه و الله هو اللى هيحكم ما بينكم، اللى هيتقبل القربان بتاعه يبقى هو اللى على حق ...
قام هابيل علشان طيب و بيحب ربنا قدم قربان احسن حاجة من الماشية اللى عنده، و قابيل قدم شوية اعواد قش و خضار من اوحش الحاجات اللى عنده، طبعاً واحد طالع يقدم قربان زى دة لا يمكن يتقبل منه، دة انت لو حتى رايح تخطب هتجيب احسن حاجة هتلاقيها!
لا، و استغرب قابيل ان القربان بتاعه اترفض و انه مكانش على حق من الاول، بدل ما يقعد مع نفسه و يشوف غلط فى اية علشان ربنا ميقبلش القربان بتاعه؟ لا مجابش الغلط على نفسه ابداً، جاب الغلط على اخوه!!
اخوه هابيل الطيب اللى عمره ما اذاه فى اى حاجة جاب الغلط عليه! .. قال علشان هابيل ربنا بيحبه اكتر، يا قابيل دة مش غلط هابيل الغلط منك انت .. مفيش .. يا قابيل انت اللى من الاول غلطان و بتقول اشمعنى هو، برضه ابداً .. لحد ما الحقد عماه، بمساعدة بسيطة بس من الشيطان .. قتل!!
لما قال لهابيل انا هقتلك، قاله بس الراحه مش فى موتى، الراحة مش فى عدم وجودى!
قابيل افتكر ان الخلاص من حياته التعيسة هو قتل الاحسن منه، و مبصش لنفسه مرة و قال ما يمكن اكون انا الغلطان!
كل يوم بنشوف الحكاية دى بتتكرر فى العالم كله، كام واحد قتل غيره علشان التانى كان انجح منه؟ كام واحد قتل علشان التانى كان مختلف معاه سواء فى الفكر او العقيدة او حتى الرأى؟ كام واحد لغى انسانيته فى مقابل انه يقتل نفس بشرية زيه علشان بس كلمة اشمعنى هو؟ كام سلطة قتلت شعب؟ كام سلطة قتلت معارضة؟ كام .. كام قابيل قتل هابيل؟
قصص القرآن مش مجرد قصص للتسلية، قصص القرآن عبره للناس فى كل زمان و مكان، للناس اللى بيستخدموا عقلهم بس :)
No comments:
Post a Comment