مين فينا يعرفك يارب؟
طفل صغير فى اعدادى مصلّاش الُجمعة غير مرتين فى حياته، و يحفظ من القرآن السورة القصيرة .. بس بيحبك و بيدعيلك قبل اى حاجة بيعملها .. و بيدعيلك فريقه المفضل يكسب، و ينجح فى امتحان الدراسات، و تشفى امه، و تخلي له اخواته و ابوه.
مين فينا يعرفك يارب؟
راجل سكّير عايش فى البارات، كل يوم ينزل من بيته على شغله على البار، يشرب لحد ما ينسى كل متاعب الحياة، و يرجع يفوق و يقول يارب .. يارب انقذنى و ارحمنى من المشاكل و المتاعب و الشرب اللى بشربه، و يرجع يشرب تانى .. بس كل ما بيفوق بيفتكرك!
مين فينا يعرفك يارب؟
الراجل العامل البسيط .. الفواعلى اللى شغال بيشيل طوب و زلط علشان يوميته و لقمة عيشه، و بيقول يارب عدى اليوم دة على خير ارجع لولادى بالعشاء و فطار تانى يوم، اعرف اعلمهم و يطلعوا احسن منى، يمكن مايكونش بيصلى الفرض بفرضه، ولا يعرف كتير عن الدين غير الفاتحة و كام اية و دعاء.
مين فينا يعرفك يارب؟
عالِم الدين .. اللى ياما تبحّر فى العِلم لدرجة انه نسى انه عايش وسط الناس، تبحّر لدرجة انه مبقاش بيشوف حد حواليه، بقى عامل زى الارض البور اللى كل ما ترمى فيها ميّه متطلعش زرع!
لا بيفيد حد بعلمُه ولا هو بيستفيد!
مين فينا يعرفك يارب؟
الشاب الملتزم اللى كل كلامه بيبدأ عن رسول الله او قال تعالى، ملتزم بسنّه الرسول فى ما يخص اللحية و الملابس و تقصير الثياب، اصحابه بيقولوا عليه بتاع مصلحته و انه مش شايف غير نفسه و مش مهم الباقى، بيدعيلك يارب تلحقه بالصالحين الذى هو ليس واحدًا منهم .. بس عمره ما فكر فى ما فعله الصالحين مع الناس علشان يبقوا صالحين!
مين فينا يعرفك يارب؟
الشاب اللى له اخطاء كتير، بيصلى و بيصوم و بيأدى الفرائض المطلوبه، بس بيغلط، بس غلطه لنفسه و بس، بيتعب علشان يرضيك يارب بس بيرجع يضعف .. و يغلط، وقت يدعيلك تهديه و وقت يقول ما انا كدة كويس .. على الاقل احسن من غيرى كتير!
مين فينا يعرفك يارب؟
الاختين اللى كل واحده فيهم بشخصية، واحدة مستنيه منك تبعتلها رزقها و المكتوب و بتحاول ترضيك على قد ما تقدر رغم كل اللى بتشوفه من صحباتها، و واحدة راحت تشوف رزقها بنفسها و بتقول بكره ربنا يهدينى على ايد اللى هيبعتهولى .. الاتنين واثقين كل الثقه فيك بس كل واحده و طريقها!
ناس هنا و ناس هناك، ناس تتعامل مع الدُنيا على انها نهاية المطاف، مع ان كل شئ زائل حتى الاشخاص! .. و ناس تتعامل على انها لعبة و اللى يجيب اسكور اكبر يدخل الجنّة .. و ناس سايباها على الله و مبتفكرش فيها.
بأختصار .. محدش هيعرف مين يعرفك يارب ولا مين بيحبك فى دول، بس اكيد انت عارف، عارف و عالِم بحال كل واحد .. بدعيلك يارب يا اللى مسير الانهار و خالق الاشجار و الجبال الاوتاد .. تهدينا و تهدى جميع البشر .. ترزقنا نور معرفتك و حبك .. آمين.
No comments:
Post a Comment