#النوستالجيا: هو شعور بالحنين للماضى .. للذكريات.كبرنا .. كبرنا يا أمى و الحياة شكلها اتغير من حوالينا ...
كبرنا و بقت الايام اكتر من مجرد وقت جميل بنقضية لحد ما ننام .. كبرنا و بقنا بنفكر فى بكرة و اللى جاى و شكله هيكون عامل ازاى؟
كبرنا يا أمى .. و بقت المشاعر اكتر من كونها حب و احترام للى بنحبهم و كره للى بنكرهم .. بقى فى حقد و مش تمنى زوال اللى عند الغير بس لا .. دة تمنى زوال الغير نفسه .. المشاعر اتعقدت و بقى فى .. اقعد معاه حتى لو مش طايقه علشان فى ما بينكم مصلحة .. دخلت المصالح حتى فى المشاعر!
بقى فيه اخرج معاهم علشان معاهم واحدة حلوة انت عايز تتعرف عليها .. بقى فيه اتكلم على صحابك من ضهرهم و قطع فيهم و جرح بكلامك بحجة انك "خايف عليهم" من اى حاجة!
كبرنا يا أمى .. بقت الاغانى اكتر من مجرد كلام حلو و موسيقى بنسمعها و نستمتع بيها .. بقى فيها حزن كتير و قرف اكتر .. الذوق العام كله نزل نزله مرة واحدة و مطلعش تانى!
كبرنا و بقينا نقول يااااااه دة الايام عدت بسرعة .. فاكرين لما كُنا .. و تبتدى نافورة الذكريات الجميلة ...
كبرنا يا أمى .. و خرجت الافلام من نطاق كارتونات ديزنى المدبلجة و اليوم المفتوح .. لافلام ليها رسالة عن كل شئ بيحصل فى العالم .. و افلام مالهاش ادنى رسالة برضه بينتجها راجل اسمه السبكى كان جزار بس بقى بتاع افلام!
كبرنا .. و بقينا بدل ما نسأل مين خطب مين اتجوز .. بقينا نسأل مين مات مين استشهد؟ بقينا مابنحسش بهيبة الموت .. بقى زى اى خبر فى الجرايد .. الموت بقى عادى و متسأليش على السبب!
كبرنا و داقت البلد علينا اوى .. بقى فى حاجة اسمها حدود .. و الحدود بقت فى كل حاجة!
فاكرة يا أمى .. فاكرة يوم الجمعة و سينما الاطفال الصبح .. و بعد الصلاة عالم الحيوان و خواطر الشعرواى؟ فاكرة العلم و الايمان و مصطفى محمود؟ فاكرة يوم الجمعة دة اصلًا؟ كان يوم عيد .. دلوقتى بقينا نستناه على الاخبار علشان نشوف كام واحد مات فى اليوم دة!
فاكرة برامج التليفزيون دى اللى كانت بتغذى العقول؟ بقت دلوقتى بتاكل فى العقول بكل الافكار الغربية و الغريبة عننا اللى بقت عادات فى مجتمعنا بسبب البرامج دى!
فاكرة و انا صغير لما كُنتى بتقوليلى كل البنات اللى معاك فى المدرسة دول اخواتك؟ كبرنا و زى ما تقولى كدة اتشالت البراءة بفعل فاعل .. بيقولوا فى حاجة اسمها شهوة ربنا حطها فينا علشان نمنعها لو كانت فى الطريق الغلط .. بقى فى طريق غلط يا أمى!
بقى فى ناس معا الدين و ناس ضد الدين .. احنا كل اللى كنا فاكرينه عن الدين و احنا صغيرين ان فى آيات من الله الرحمن فى القرآن بتنور ايامنا .. بقى فى ناس بأسمها بتضلم ايامنا!
انا فاكر كان فى ولاد و بنات بيقوموا فى حصة الدين دى .. كان بيقولوا عليهم مسيحين .. دلوقتى بيقولوا مضطهدين .. مش عارفين يعيشوا فى بلدهم! و لا المسلمين عارفين!!
بقى فى حاجة فى اللبس اسمها مُحترم و مش مُحترم .. بقى فى لبس ينفع و لبس ما ينفعش .. بقى فى ناس بتمشى ورا البنات اللى مش لابسين كويس دول و ترخم عليهم و تلمسهم .. بيقولوا كمان اللى لابسين محترم بيحصلهم كدة .. واضح انها مبقتش فارقة!
فاكرة صُحابى؟ اللى كنتى بتقولى انهم اغلى حاجة يملكها الانسان بعد امه و ابوه و عيلته؟ دول بقى بقينا نغيرهم كل سنتين او اقل او اكتر .. بقى فى مصالح، سياسة، نفاق و حب .. تخيلى الحب اللى هو شئ جميل بقى فى ناس بتخسر بعض بسببه؟
بقى فى اتنين اصحاب ممكن يتخانقوا و مايتكلموش مع بعض بالسنين علشان خاطر حبوا نفس البنت .. علشان خاطر كل واحد فيهم له رأى مختلف فى حاجة ...
فاكرة لما كان الاختلاف فى الرأى لا يُقسد للود قضية؟ بقى بيترفع بسببه قضايا كتير .. و بيموت بسببه ناس أكنر!
بقى فى دول كبيرة و دول صغيرة .. بقى فى دول تابعة لدول .. بقى فى حلفاء و اعداء .. بقى فى مؤامرات بين كل دول بقى!!
عارفة بقى فى اية كمان؟ بقى فى ناس بتتخانق على هو ربنا موجود ولا لا؟ اة والله بقى فى كدة و فى مصر اللى قولتيلى انها فى القاهرة بس فى الف مآذنة .. بقى فى الفين مآذنة بس الناس اصلًا مبقوش يروحوا المساجد!
فاكرة كلمة الرضى؟ و ارضى باللى قسمهولك ربنا .. كبرنا و عرفنا ان مفيش حد راضى .. حتى انتِ يا أمى مش راضية .. الظالم زاد فى ظلمه .. و الغنى زاد فى غناه و عايز يزيد اكتر .. و الفقير زاد فى فقره و بيزيد .. و المفروض انى اصبر و ارضى!
الدُنيا مش زى ما انتِ حكيتيلى عنها خالص يا أمى .. اتغيرت زى ما اتغيرنا .. بس بقت اوحش!
كفاية كدة؟ انا بقول كفاية .. نحاول نغير؟ جايز مين يعرف؟ :)
