ليلة فى البيت القديم ... 3

بعد ان التقط انفاسى من الهواء بصعوبة .. رددت على محمد "ماتت؟ انت متأكد؟" .. رد على محمد بأستغراب شديد "متأكد؟ مالك يا طلعت في اية؟ أنت كويس؟" .. "أنا .. أنا مش عارف كويس ولا لا .. محمد انا لازم اشوفك" .. "طيب بكرة يا طلعت نتقابل ..." قاطعته "لا بكرة مش هينفع خليها دلوقتى" .. رد و كأنه يتحدث الى مجنون "دلوقتى اية بس يا طلعت انا لسة راجع من السفر ملحقتش ارتاح .. خليها بكرة مش هيحصل حاجة" .. رددت عليه بنبرة غضب "محمد انا شفت ماما وفيّة" .. رد بتعجب شديد "شُفتها ازاى؟ حلم يعنى؟" .. "لا شفتها حقيقة فى شقتكم .. و كلمتها كمان" .. "طلعت .. أنت اكيد بتخرف .. دى ماتت من سنتين يا طلعت و انا اللى دفنها بنفسى" .. "صدقنى يا محمد .. انا شفها بنفسى" للحظة شككت فى نفسى .. هل رأيتها فعلاً ام انها مجرد هلاوس من التعب و الصدمة .. ولكننى كلمتها .. نعم كنت اكلمها و اسمع صوتها.

رد على محمد بغضب "يا طلعت انت شكلك بتخرف و الصدمة كانت شديدة عليك .. انت محتاج تنام لحد الصبح و بكرة نتقابل" قالها و اغلق الهاتف فى وجهى .. غضبت قليلاً ثم قُمت لكى اشرب كوباً من اللبن الساخن لعلى استطيع به ان انام .. مشيتُ حتى وصلت إلى الثلاجة .. فتحتها فلم اجد بيها اى شئ سوى بعض الجبنة القديمة التى كانت تحبها امى و زجاجات من المياة بعضها فارغة.

لعنت حظى و اغلقت الثلاجة .. و انا فى طريقى للغرفة وقفت عند غرفة امى فى الطرقة المؤدية لغرفتى .. و نظرت الى كرسيها المُتحرك .. و وجدت نفسى اسأل *هى امى من امتى بتقرأ كُتب عن تاريخ اليهودية؟ اما نشوف كانت بتقرأ اية؟* .. امسكت بالكتاب و جلست على الكرسى المُتحرك اتصفحه .. قرأت الفهرس و ما يحتوية الكتاب و عرفت انه عن تاريخ نشأة اورشاليم و علاقتها باليهودية فى العهد القديم.

و انا اقلب صفحات الكتاب .. وجدت ان بداخله ورقة .. ورقة من كتاب قديم مكتوب عليها كلمات ليست مطبوعة و انما مكتوبه باليد .. مكتوب فى اولها "المندل و السحر السليمانى" .. بدأت اقرأ ما فيها "يا ايها الموكَلون من مالك الكون و خالقة .. بخدمتى و طاعتى و تسخيرى لكم .. انصرفوا فلا تؤذوا احد .. انصرفوا فلا تؤذوا احد بحق مالك الكون خالق الحروف و الكلمات .. قسمى عليكم بالا تؤذوا احد" .. اقرأ هذا الكلام و انا ارتعد .. من هم الموكلون و لماذا هذة التعاويذ و الاشكال الغريبة المرسومة فى الورقة؟ لا افهم ربما كانت امى ... مهلاً لحظة اهذا خطى أنا؟ .. هل أنا من كتبت هذة الكلمات؟ .. لا لا يمكن! .. او ان خط امى اصبح يشبه خطى كثيراً فى اخر ايامها!

بعد قرأتى لهذة الكلمات احسست بهزة شديدة للكرسى و سمعت صوت امى تغنى لى من جديد .. تصارعت نبضات قلبى و قفزت من على الكرسى بسرعة انظر ورائى .. فوجدتها .. وجدت امى تقف فى زاوية الغرفة و تحملنى و انا صغير .. اغمضت عينى و انا اتمنى ان تختفى الصورة عندما افتحها من جديد .. فتحت عينى و لم تختفى الصورة .. لم اعرف ماذا افعل .. وجدها تنادينى "طلعت اية مالك خايف منى؟ قرب تعالى" .. اقتربت منها قليلاً و لكنى سرعان ما ابتعدت .. وجدت الطفل الذى بيدها عليه دماء و مشوه بصورة بشعة .. لم استطع تحمل المنظر قلبى اسمع نبضاته عالية كصوت قدوم المترو .. و عرقى قد انهمر كأننى وضعت نفسى فى ساونا!

لم اعرف ماذا افعل .. ركضت حتى وصلت إلى غرفتى .. اخذت مفاتيح سيارتى و جاكيت و المحفظة و خرجت مسرعاً من الشقة .. نزلت و ركبت السيارة و تجولت بها فى شوارع وسط البلد .. توقفت على النيل و اخذت افكر فى ما يحدث .. هل هو حقيقة ام مجرد هلاوس؟

وأنا افكر .. وجدت نفسى انام قليلاً .. فاذا بى اصحوا على رن هاتفى المحمول و الشمس قد ظهرت فى السماء .. انه رقم محمد .. "اهلا يا محمد" .. "اسف يا طلعت لو كنت صحيتك من النوم .. انا كنت صاحى بس خُفت تكون انت نمت .. انا اسف على طريقة الكلام اللى كلمتك بيها .. لو فاضى ممكن نتقابل دلوقتى" .. "لا ولا يهمك يا محمد .. انا دلوقتى فى وسط البلد .. قاعد فى العربية .. تعالى نتقابل" .. "تمام هكون عندك كمان نص ساعة".

انتظرته حتى اتى .. نزلت من سيارتى و سلمت علية "محمد .. ازيك ليك وحشة والله" .. "البقاء لله يا طلعت" .. "ونعم بالله يا محمد" .. "تعالى يا طلعت نتمشى شوية على النيل و احنا بنتكلم .. عايز اقولك على حاجة" .. تحركنا قليلاً "قول .. ساكت لية؟" .. سكت قليلاً ثم نظر بعيداً "طلعت انت .. مريض" .. نظرت له بتعجب شديد "مريض؟ يعنى اية؟ تقصد اية؟" .. ما زال ناظراً فى اتجاه اخر "نعم مريض بالهلوسة"!

فى هذة اللحظة احسست ان هناك من تقول فى رأسى *عزيزى المستمع ارجو ربط احزمة الامان لأن ما ستسمعه لن يكون خفيفاً عليك و من المحتمل وجود اضطرابات فى بعض الكلمات القادمة*

اكمل هو حديثه بعد ان نظر إلىِّ .. "طلعت انت جيت هنا من سنتين ساعة موت ماما وفيّة .. و كنت متغير .. كنت بتتكلم فى حاجات غريبة عن سيدنا سليمان و تعاويذ و حاجات كدة كتير .. و بعد كدة لقيتك بتردد الكلام دة" .. نظر بعيداً ثم اكمل "بعدها رحت انا و انت لدكتور نفسى و قال انك .. قال انك محتاج علاج .. وكان شكلك موافق جداً على كلامه و بعد ما خرجنا من العيادة قُلتلى انه مجنون ان انت سليم .. و روّحت بعدها و تانى يوم عرفت انك سافرت تانى".

نظرت حولى فلم اجد غيرى انا و هو .. لا اعرف ماذا افعل .. هل انا اهلوس فعلاً؟ نظرت له و انا اتذكر كل ما رأيته "يعنى .. يعنى انا بهلوس؟ طيب و اية اللى يثبتلى انى مبهلوسش دلوقتى كمان؟" .. نظر لى بنظرة شفقة "طلعت .. أنت لازم تتعالج .. حالتك دى ...." قاطعة بغضب شديد "حالتى مالها .. انا كويس مفيش فيا حاجة .. انت اللى عقلك راح بعد موت ماما وفيّة .. انت اكيد بتكدب عليا انت اللى اتجننت" .. اكمل حديثة بنفس نظرة الشفقة "طلعت .. امى اللى انت بتقول شوفتها دى ميته من سنتين و انا بايع الشقة من بعد ماتت بتلات شهور .. فوق يا طلعت .. انت لازم فعلاً تتعالج".

و انا استمع لكلامة .. شعرت و كان صوته يبتعد و عيناى تغمض ولا استطيع المشى .. اتحرك بصعوبة .. اسقط على الارض بالتصوير البطئ .. احست بارتطام جسدى الهزيل إلى الارض .. و يختفى العالم من امامى.

استيقظت فى اليوم الثالث و انا فى المستشفى .. محمد نائم بجانبى "محمد .. اية اللى حصل؟" .. استيقظ و نظر لى بأبتسامة "حمدلله على السلامة .. انت اغمى عليك امبارح و جيت بيك على المستشفى .. نقص تغذية يا بطل".

نظرت الية نظرة حزينة و الدموع تكاد تنهمر "محمد .. أنا لازم اتعالج" .... تمت.

ليلة فى البيت القديم ... 2

نظرت الى صورة الحاج المعلقه امامى على الحائط و أنا ارتعش خوفاً .. ركضت بسرعة نحو الباب و خرجت .. هل احلُم؟ ما الذى حدث بالداخل .. اخذُ نفسى بصعوبة بالغة .. لا اجد الاكسجين فى الهواء .. اشعر كأننى سوف اقع على الارض من شدة الخوف و التعب.

تحاملت حتى وصلت إلى باب شقتى .. وضعت المفتاح فى القفل .. و بكل ما تبقى فى من قوة .. فتحت الباب و كأنه الملجئ و الملاذ الاخير لى!

فتحت الباب .. وجدت كل شئ مُرتب كما تركته .. لم يحدث الا بعض التغيرات فى الاثاث .. اريكة جديدة انظمت إلى المجموعة لونها ارجوانى .. و لكن المكان مملوء بالتراب .. دخلت إلى غرفة امى فوجتها كما تركتها تماماً .. سريرها فى الجانب الايسر من الغرفة .. و كرسيها المتحرك تحت النافذة كما هو .. و كانت لا تزال تحتفظ بمجموعة من صورى فى كل مراحلى العمريه على الحائط امام الكرسى.

وجدت على المنضدّة .. نظارتها الزرقاء الكبيره التى كانت تزين وجهها وقاراً .. و اخر كتاب كانت تقرأ فيه "تاريخ اورشليم" .. ما هذا الكتاب؟ و لماذا كانت تقرأ فيه امى؟! .. هل اصبحت مهتمه بالتاريخ اليهودى القديم؟ لا أعرف .. ربما.

مرت علي الساعات و انا جالس فى كرسيها المتحرك و اتذكر ذكرياتى معها .. اتذكر كيف كانت تعاملنى بلطف شديد حتى عند الخطأ .. كانت مثالاً للرحمة على الارض .. رحمكِ الله يا أمى .. تذكرت و نزلت الدموع من عينى .. حتى احسست انه غلبنى النعاس .. ما هذا؟ ما الذى اسمعه الان؟ .. اهو صوت امى؟ نعم انه صوت امى .. تغنى لى اغنيتى عندما كنت اذهب للنوم "نام يا حبيبى نام" كانت تغنيها بصوت رقيق .. هل احلُم؟ اننى اسمع صوتها يقترب من اُذنى .. اسمع جيداً كلمات الاغنية فى اذنى اليسرى .. اسمع معها صوت اهتزاز مهد! .. هل وصلت لهذة الدرجة من التعب و الارهاق حتى اسمع خرافات فى اذنى؟!

قلبى يخفق بسرعة شديدة .. اشعر و كأنها بجانبى .. تهز كرسيها الذى اجلس عليه .. لا اعرف ماذا افعل؟ .. انتفضت من مكانى اتلفتُ حولى فلم اجد احداً .. لم اجد شيئاً .. اغمضت عينى و تنهدت فى ارتياح.

دخلت إلى غرفتى القديمة .. فوجدتها مرتبه قليلاً عن باقى الشقة .. هل كانت امى ترتب حجرتى أكثر من الشقة بكاملها؟ .. رحمكِ الله يا أمى فقد كنتِ خير ام .. ذهبت لارقد على سريرى الذى افتقدته .. و صور اللاعبين المعلقة امامى "مارادونا و بيلية و بيكهام و راؤول" و جميع نجومى المفضلين .. نظرت اليهم و اغمضت عيناى استعد للنوم .. و اذا بهاتفى المحمول يرن .. من هذا الحيوان الذى يتصل فى هذة الساعة من الليل؟

التقت هاتفى و وجدت ان المتصل اسمه لم يظهر عندى رددت ببرود شديد "الو" .. فسمعت الرد "الو .. ازيك يا طلعت .. البقاء لله أنا عارف انها كانت غاليه عندك جداً" .. حاولت تذكر الصوت لكن لا اتذكر لمن هذا الصوت؟ .. "و نعم بالله .. مين معايا؟" .. "أنا صلاح يا ابنى! مش فاكرنى صلاح الفقبر؟ اللى كنت معاك فى الجامعة!" .. بصعوبة رددت لأننى لا احب هذه الشخصية "اة صلاح .. افتكرتك .. انا الحمدلله كويس" .. "طب الحمدلله انا قلت اتطمن عليك بس .. هو العزا امتى صحيح؟" .. حاولت اخفاء غضبى و تعبى من غباء هذا الكائن "العزا خلص يا صلاح .. هو برضه هيكون فى عزا الساعة واحدة بعد نص الليل؟" .. رد بغباء "أنا افتكرت انها ماتت النهاردة فقلت ممكن يكون الغزا مطول لحد دلوقتى" .. رددت بكل برود "صاحب واجب طول عمرك يا صلاح .. مع السلامة!" اغلقت الهاتف و وضعته بجانبى.

احاول النوم .. لا استطيع .. فى داخلى اقول *الله يخربيتك يا صلاح .. بس لما اشوف مين اللى اداك رقمى* .. احوال النوم مجدداً لا استطيع .. اتقلب كثيراً حتى انام لا استطيع .. و كأن النوم لا يريد ان يمنحنى فرصة اخرى!

احضرت الراديو القديم الذى كانت تمتلكه امى .. حاولت ضبطه على اذاعة القرآن الكريم .. لم استطع فى اول الامر .. يبدو اننى نسيت كيف اضبط تردد الاذاعة .. حاولت كثيراً حتى نجحت .. تركتها بجانبى تقرأ على مقطع من سورة البقرة
"وَاتَّبَعُواْ مَا تَتْلُواْ الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُواْ يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولاَ إِنَّمَا نَحْنُ فِتْنَةٌ فَلاَ تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُم بِضَارِّينَ بِهِ مِنْ أَحَدٍ إِلاَّ بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلاَ يَنفَعُهُمْ وَلَقَدْ عَلِمُواْ لَمَنِ اشْتَرَاهُ مَا لَهُ فِي الآخِرَةِ مِنْ خَلاقٍ وَلَبِئْسَ مَا شَرَوْا بِهِ أَنفُسَهُمْ لَوْ كَانُواْ يَعْلَمُونَ"

هدأت كثيراً و ارتحتُ و انا اسمع هذه الايات .. اغمضت عينى فى محاوله للنوم و اذا بى افاجئ بأن اذاعة القرآن الكريم استُبدلت بتردد لأذاعة اغانى .. ماذا حدث؟ هل اصبح الراديو قديماً جداً حتى انه يغير بين الترددت بأستمرار؟

استمعت قليل فوجدت اننى اعرف هذا الاغنية .. انها اغنية "God's gonna cut you down" للمغنى "Johhny cash" .. يغنيها بنغمة صوت ثقيله .. لازلت اراجع ما حدث .. و لماذا حدث؟

مدت يدى و اغلقت الراديو و قلت بصوت مسموع "بكرة اشترى واحد جديد بدل اللى خرب دة" .. تقلبت حتى نمت على ظهرى و انا انظر إلى السقف .. افكر فى ما يحدث .. هل هذا فعلاً حقيقى ام اننى اتخيل هذه الاشياء من صدمة الخبر؟ و انا افكر سمعت رنه هاتفى المحمول مرة اخرى!

من هؤلاء المعاتيه الذين يتصلون فى اوقات متأخره كهذة؟ ردت بنبره غضب "الو مين معايا؟" .. سمعت صوت يرد بهدوء "اسف لو كنت ازعجتك بس انا لسة راجع مصر حالاً والله .. البقاء لله والدتك كانت غاليه على جداً" .. اميز هذا الصوت و لكنى لست متأكداً .. "و نعم بالله .. مين حضرتك؟" .. يرد بهدوء "أنا محمد سليمان .. جاركم اللى فى الشقة اللى قصادكم" .. رددت بسعادة على صديق الطفوله "محمد ازيك؟ والله واحشنى جداً أنا لازم اشوفك و كويس اننا رجعنا مصر فى نفس الوقت" .. "اة والله و انت كمان واحشنى جداً .. اخبارك اية؟" .. "أنا اهو الحمدلله كويس .. وانت اخبارك اية؟ و اية يا ابنى بقالك غايب قد اية عن ماما وفيّة؟"

رد بنبره حزن "هى اللى غايبه عنى من سنتين و نص .. الله يرحمها" .. فجأة احسست اننى لا استطيع النطق .. هل يقول فعلاً انها ماتت ام انها مجرد هلاوس النُعاس؟ .. احس ان قلبى توقف عن النبض و نفسى لم يعد يدخل إلى رئيتى  .. ارجو ان ما يقوله ليس حقيقة .. ارجو ان يكون مجرد كابوس مفزع لا أكثر ..... يُتبع

ليلة فى البيت القديم ...

كنت قد سافرت للعمل فى بلد خليجى لكسب العيش .. اعمل مديراً لاحدى شركات الهندسة فى الخليج .. سافرت بعد التخرّج بثلاث سنوات .. لم اكن اعرف اننى سأعود الى بلدى.

ماتت امى .. ماتت من بقى لى من بعد ابى .. فأنا لم يكن لى اخوه ولا اخوات .. عدت بعد ان سمعت الخبر .. لم يكن سهلاً على تحمل هذا الخبر الصادم .. ظللت ابكى حتى كادت ان تجف عروق عينى.

عدت و لم اكن اريد العودة .. عدت و ذهبت لجنازتها .. جنازة امى الحبيبة .. لم استطع الوقوف لاكثر من نصف ساعة .. فقد هزيلاً كورقة قُطعت من كُراس.

بعد العزاء قررت الذهاب الى بيتها .. او بيتى القديم الذى عشُت فيه اجمل سنين عمرى .. قد كان بيتاً قديماً فى الجمّاليه .. مكون من اربعة طوابق فى كل طابق شقتين.

شقتنا فى الدور الاخير من البيت .. هذا البيت بناه جدى قبل خمسين سنة .. و كان لا يُسكنه الا لافراد عائلتنا .. و لكن بعد سفر عدد كبير منهم للخارج .. باع الشقق الفارغة.

فى الشقة التى امامنا كانت تسكن عائلة مكونه من اربعة .. الاب و هو متوفى منذ زمن .. و الام و هى من ترعى الاسرة .. و ابن يعمل مهندس بترول .. و بنت متزوجة.

صعدت الى الشقة بصعوبة .. فقد كان السُلّم قديماً و مُتأكلاً .. صعدت و اذا بى اسمع صوت جارتى ابله وفيّه تنادى على ابنها "يا محمد .. يا محمد" .. كانت تترك الباب مفتوحاً لانها لا تستطيع الحركة كثيراً .. دخلت عليها بأبتسامة "نعم يا أمى .. اؤمرنى" .. نظرت الى بتضيق العينين كى ترانى جيداً "مين؟ طلعت؟ ازيك يا ابنى .. قلبى عندك يا حبيبى والله فى اللى حصل .. الله يرحمها شدة و تزول".

منعت دموعى بصعوبة و قُلت لها "الحمدلله .. الله يرحمها .. البركة فيكى يا أمى" .. نظرت الى بحزن و حاولت رسم ابتسامة على وجهها الملئ بالتجاعيد التى تحكى قصصاً كثيرة عن كفاح هذة المرأه "البركة فيك أنت يا حبيبى .. أنا مش عايزة اتقّل عليك والله" .. "لا لا ولا يهمك يا أمى اؤمرينى بس" .. رفعت يدها بصعوبة و شاورت على صورة مُعلّقة للحاج سليمان زوجها "هاتلى الصورة دى يا ابنى .. كنت عايزة بس احطها جنبى" .. قُلت فى نفسى "يا الله .. فى حد عنده وفاء كدة فى الدُنيا؟".

ذهبت لأحضار الصورة و اذا بى التفت ورائى فلا اجدها! .. "اية دة هى راحت فين؟" .. تحركت فى المكان التى كانت تجلس فيه على كرسيها المتحرك و تحركت فى الشقة "يا أمى انتِ رُحتى فين؟".

سمعت صوتاً يرد من داخل احدى غُرف البيت "انا هنا يا ابنى" .. ذهبت إلى مصدر الصوت و وجدتها قد نامت على سريرها .. ابتسمت "الصورة اهى يا امى اتفضلى" .. اخذت الصورة و وضعتها بجانبها و لم تتكلم ؟.. ظلّت تنظر اليها فقط  .. نظرت اليها و قُلت "امال فين محمد مش قاعد معاكى لية؟" .. نظرت الى و قالت "محمد مسافر .. مسافر من سنتين".

قُلت فى نفسى *مسافر .. مسافر اية دى لسة كانت بتنادى عليه مش شوية؟!* .. قررت ان اتركها لتستريح "انا همشى بقى يا أمى لو احتجتى حاجة انا فى الخدمة بس اندهى و انا اجيلك جرى" .. نظرت الى بحده و قالت "استنى .. قبل ما تخرج رجع الصورة مكانها .. الحاج مش مرتاح و هو هنا" .. استعجبت من كلامها *حاج اية اللى مش مرتاح دة .. الست تقريبأ بتخرف! ربنا يشفيها*.

اخذت منها الصورة بأبتسامة مزيّفة "حاضر يا أمى" .. ذهبت لاضع الصورة مكانها فلم اجد المسمار .. *هو المسمار وقع و أنا برفع الصورة ولا اية؟ جايز .. انا احطها هنا و اروح شقتى و بكرة ابقى اركبلها مسمار غيره* وضعت الصورة على الطاولة و تحركت نحو الباب و اذا به مقفول *مين الغبى اللى قفل الباب؟ جايز الهوا ولا عيل من العيال الشياطين جيرنا دول* فتحت الباب و خرجت و تركته مفتوحاً و ذهبت الى شقتى.

كان الباب مغلق بالمفتاح .. اخرجت المفتاح من جيبى .. و اذا به لا يفتح الباب *يادى النحس .. المفتاح ماله بس؟ اية امى الله يرحمها غيرت الكالون ولا اية؟ اشوف يمكن حاجة وفيّة عندها نسخة؟".

نظرت خلفى و وجدت الباب مفتوحاً .. دخلت الى الشقة و فؤجئت بالحاجة وفيّة تجلس بكرسيها المتحرك فى نفس المكان! "انتِ هنا يا حاجة؟ انا اسف بس كنت عايز اسألك بس هى ماما قبل ما تتوفى كانت غيرت الكالون؟" نظرت الى بأبتسامة عجيبة "لا يا ابنى امك مغيرتش الكالون يمكن بس الكالون معلّق" هززت رأسى "اة صح جايز برضه" .. و بينما استعد للخروج و اذا بى افأجئ بصورة الحاج مُعلقه كما اخذتها و لم تكن على الطاولة كما تركتها .. شعرت بان الدم هرب من عروقى  و لم يعد بمقدورى الوقوف فقد كانت ركبتى تشتبكان مع بعضهم البعض و اشعر بقشعريرة فى ظهرى ..

ماذا يحدث هنا؟ ما الذى يحدث لى فى هذا البيت؟ هل انا احلم ام ان الحقيقة اكثر رعباً من الحُلم؟ .. يُتبع ....

اول اوروبى يدخل افريقيا ...

الناس قبل ما تكتشف الكهرباء .. و يعملوا عواميد النور .. كانوا بيناموا مع اول الليل و يصحوا مع فجر الشمس .. بعد اكتشاف الكهرباء الناس نهارهم بقى ليل و الليل بقى نهار .. بقت الناس تحب تصحى باليل اكتر ما تصحى بالنهار ...

لما اكتشف الرجل الاوروبى افريقيا و حط رجله فيها .. كان كل الناس اللى هناك بالنسبه له حيوانات ناطقة .. عبيد محتاج يستعبدهم بفلوسه و علمه و تقدمه.

اول اوروبى كلمهم كان مبشر .. واقف قدامهم بملابس نظيفه .. و هما كلهم زى ما بنشوفهم فى الافلام يعتبروا مش لابسين حاجة و حافيين .. واقفين يسمعوا الراجل المتنوّر اللى جاى يكلمهم ....

قال بصوت عالى: "يا احبائى .. لا تسرقوا" .. فكلهم بصوا لبعض و عينهم بتقول "نسرق؟ يعنى اية نسرق دى؟" لأن كل واحد فيهم بياكل اللى يصتاده .. و يمتلك اللى يزرعه و يأخد الفاكهة اللى يقطفها .. محدش فيهم هيحتاج يسرق حاجة!

 قام المبشر كمل كلامه "يا احبائى يجب على الغنى الا يظلم الفقير و ان يعطى له مما اعطاه الله" .. و لكن هو مين الغنى و مين الفقير؟ دول حتى ما عندهمش جُحر يخبوا فيه الفاكهة و غيرها من السلع اللى بيخدوها من الطبيعة!

مفيش بينهم غنى او فقير .. مش هيكون فى ما بينهم حقد ولا حسد ولا حد يتمنى الفقراء يختفوا علشان بيبوظوا شكل الدنيا .. ولا حد هيسرق من التانى علشان عايز اللى فى ايده! مش هيعرف الراجل الاوروبى يستعبدهم طول ما هما معندهمش الصفات دى.

طيب ما نعملهم حاجة توازى الفلوس تخلي ما بينهم اغنيا و فقرا .. قعدوا يفكروا يعملوا اية ملقوش غير الشجر .. اه الشجر .. قالولهم يقطعوا الشجر.

ناس فيهم قطعوا الشجر و معرفوش يعملوا اية به .. جم ناس علموهم الاوروبين النجاره و قالولهم اعملوا خشب من الشجر .. عملوا الخشب و برضه معرفوش يعملوا به اية؟ .. جم ناس تانين قالوا ما نبيع الخشب دة .. بس هنبيعه لمين و مقابل اية؟

اتفقوا على انهم يشحنوا الخشب دة على اوروبا و يجوا معاهم شوية من العبيد يشيلوا الخشب دة .. الناس اللى راحوا مع الخشب دول اخدوا تمن توصيلهم فبقوا اغنى و رجعوا بسلع استهلاكية .. و عملوا نظام مقايضة .. يقايضوا الخشب بالسلع ..

و ابتدوا يبقى فى اسياد من السود و فى عبيد .. و اسياد السود عبيد الاوروبين .. و بقوا يوصلوا لهم الخشب و الفاكهة اللى يطلبوها و يأخدوا المقابل ..

ابتدت فكرة السُخره و استعباد النفس و التجارة و الواسطة و السمسرة .. و الضرب بالكرباج!

خلاص بقوا قادرين يتحكموا فيهم بعد ما دخل ما بينهم الغرور و الاستعلاء .. بعد ظهور الطمع و الجشع و قذارة النفس البشرية بقى سهل استعباد البشر لغير الخالق .. حتى من غير حروب .. زى ما بيحصل دلوقتى بالظبط .. اللى اتغيرت بس الاساليب .. بقت احدث :)

بالعكس .. استعبادنا احنا بقى اسهل .. تمسكُنا بشهواتنا و رغباتنا خلى استعبدنا اسهل من امتلاك الحيوانات!

هل اخطأ الرسول (ص) فى معاملة عبدالله ابن ان مكتوم الاعمى؟

بسم الله الرحمن الرحيم "عَبَسَ وَتَوَلَّى * أَنْ جَاءَهُ الْأَعْمَى * وَمَا يُدْرِيكَ لَعَلَّهُ يَزَّكَّى * أَوْ يَذَّكَّرُ فَتَنْفَعَهُ الذِّكْرَى * أَمَّا مَنِ اسْتَغْنَى * فَأَنْتَ لَهُ تَصَدَّى * وَمَا عَلَيْكَ أَلَّا يَزَّكَّى * وَأَمَّا مَنْ جَاءَكَ يَسْعَى * وَهُوَ يَخْشَى * فَأَنْتَ عَنْهُ تَلَهَّى"

سورة عبس من السور اللى بتعلمنا حاجات كتير .. اهمها متبصش للناس على انهم قيليلن لمجرد ان عندهم عاهه .. انت متعرفش اللى جواهم .. متحكمش على الناس بغير عِلم ...

فى السورة دى الله بيعاتب- او دة اللى اعتبره المفسرين- الرسول .. لية؟

الرسول كان احرص الناس على دعوة جميع الناس .. جيه وقت كان الرسول ركز على عظماء قريش .. و قعد يدعوهم كتير .. و يكلمهم عن الاسلام و سماحته ..

فى مرة من المرات جاله رجل اعمى اسمه "عبدالله ابن ام مكتوم" الراجل دة قال للرسول- صلّ  الله عليه و سلم- "علمنى مما علمك الله" .. و الرسول سابه و مشى يدعى عظماء قريش ..

الله عاتبه .. لية معلمتهوش؟ علشان اعمى يعنى؟ .. تعرف منين انه مش هينفع الدعوة؟ تعرف منين انه مش اطهر و ازكى من كل سادة قريش؟ مش يمكن لما تعلمه يعلم غيره؟ جالك يسعى و انت اعرضت عنه ...

فى الايات دى ربنا بيعلمنا حاجتين مهمين .. متحكمش على الناس من مظهرها و مترفصش طلب من واحد جايلك يطلب علم .. لأنك متعرفش ممكن العلم معاه يتقل لناس تانيه لانه حريص على العلم.

القرآن مش كتاب اوامر و نواهى و بس .. القرآن كتاب نزل علشان يعلم الناس ازاى يتعاملوا مع بعض .. الدين اصله المعاملة .. عمر الناس ما هتبص لدينك بنظرة كويسه غير لو كانت معاملتك طيبه مع الناس ..   خلى معاملتك طيبة مع الناس :)

عصر الانتفاخ ...

بعد حرب اكتوبر .. ابتدا عصر جديد الناس متعرفش عنه حاجة .. عصر فيه اللحمة زاد سعرها .. عصر انفتاح اقتصادى! يعنى اية مش عارف؟ .. عصر الاكتفاء الذاتى و انك تزرع اللى تاكله و تاكل اللى تزرعه ...

فى العصر دة .. حصل انفتاح ثقافى فى السنيما و المسرح و التليفزيون .. حصل نوع من الحرية بعد كبت الحرب و جو الوطنية .. حرية بقى و انفتاح .. كان جديد على الشعب المصرى  ...

القصة دى بقى حصلت فى العصر دة .. القصة بتقول .. ان كان فى راجل عقيد فى الجيش ساعة حرب اكتوبر .. و بعد الانتصار حصلت عمليات حربيه بين الجيش المصرى و الكيان الصهيونى فى سيناء و طابا ..

العقيد "أشرف حسن" كان من الناس المشاركة فى الحروب دى .. بعد ما خلصت الحروب دى سنة 1976 .. العقيد أشرف حسن قرر يرجع بيته و يشوف ولاده و مراته ...

العقيد أشرف كان عنده بنت و ولدين "ناهد" و "طاهر" و "جمال" .. كانت اعمارهم فى العشرينيات يعنى من 25 و اقل .. كان سايبهم من سنين و ميعرفش عنهم حاجة ...

رجع البيت و لقاه متغير .. اللون الابيض اللى على الحيطان بقى اصفر و ازرق! .. التلفزيون بقى أكبر .. الصور اللى على الحيطان .. مبقتش صور جدوده و اعمامه .. بقت صور لعبدالحليم حافظ .. و فرقه "The beatles" و الفيس بريسلى .. و غيرهم ....

اما ولاده .. فدول اتغيروا 180 درجة ...

الكبير "طاهر" .. طول شعره و مش مسرحه .. بقى شبه اسرى الحرب الاسرائلين الجنود المصريين .. لابس بنطلون احمر و قميص ازرق مفتوح لحد بطنه .. و لابس سلسلة دهب كبيره حوالين رقابته و بيعزف مع فرقه موسيقيه ...

بنته "ناهد" .. لقاها لابسه مينى جيب قصيره لونها اصفر .. و قميص معقود من اخره لونه اخضر .. و بطنها منتفخه و كأنها حامل!!

اما ابنه الصغير "جمال" .. فبقى شكله عامل زى عمال النظافه .. لابس جاكيت واسع و تى-شيرت ابيض مخطط .. شعره طويل شويه و منعكش .. و لابس نظاره كبيرة .. و مربى دقنه و ماسك كتاب كبير فى ايده اسمه "رأس المال" لكارل ماركس!

ابتدى الاب يسألهم عن احوالهم .. الاول كان عازف فى فرقه و بيسهر بره البيت اكتر ما بيقعد فيه .. و الويسكى و الفودكا بالنسبه له زى المياه .. و الماريجوانا و الحشيش مبيفرقوش سجايره ...

اما الثانيه .. فطلع الانتفاخ دة حمل فعلاً .. زعل الاب جداً انه مشاركش بنته بفرحتها فى ليلة جوازها .. فقالت له بضحك "جواز اية بس يا بابا؟ دة جيه كدة و كدة يعنى من غير جواز" .. الاب اتفزع "من غير جواز؟" .. البنت بتكمل ضحك "مستغرب لية؟ عادى يعنى!!" ..

"واضح فعلاً انى بقيت متخلف و دقة قديمة .. طيب ما تعرفونى اية اللى جرى فى البلد؟!" .. بهدوء قعد مع ولادة التلاته يفهموه اية اللى حصل فى البلد ....

كان كلامهم "احنا يا بابا عندنا فلسفة بنسعى لها .. الفلسفة دى هى الحرية .. يعنى تعمل اللى انت عايزه من غير ما حد يقولك عيب و حرام و غلط .. اجدادنا بتوع التاريخ كذابين .. و الاباء كذابين .. و رجال الدين منافقين .. مش عايزين حد من دول يقولنا نعمل اية و منعملش اية .. احنا احرار .. احرار .. نحب فى الوقت اللى احنا عايزينه و نشتغل فى الوقت اللى احنا عايزينه مش من حق حد يفرض علينا حاجة .. احنا احرار ....

فكر الاب شوية و قالهم "فكرة كويسه فعلاً انا كمان محتاج اكون زيكم .. محتاج اكون حُر" .. و فعلاً ابتدى الاب يبقى حر .. ميستحماش لفترة كبيره .. يطول شعره .. يلبس بنطلونات ضيقه ..

لحد ما مرة دخل عليهم ابوهم عامل بنطلون الجيش شورت قصير و مش لابس غيره .. و لابس الكاب بتاع العسكرية ..

-اولاده اتفاجئوا و اتضايقوا من المنظر دة "بابا اية اللى انت عامله فى نفسك دة .. دى حاجة تكسف بجد .. شكلنا يبقى اية قدام الجيران؟"

-ضحكة خبيثه لا وش الاب "مش الجيران دول برضه دقة قديمه؟ و بعدين انا حُر .. البس اللى انا عايزه و اطول شعرى زى ما انا عايز .. اعمل اللى انا عايزه .. مش هى دى الحرية اللى انت عايزنها؟ ولا هى شعارات استهلاكية بتقولوها للاستخدام الشخصى فقط؟!" ...

-بنته اتضايقت جداً "يعنى يبقى اية منظرى قدام اصحابك لما يشوفوك كدة؟"

-"و اصحابك دول مقالوش حاجة لما شافوا بطنك كدة؟ و مفكرتيش اصحابى انا ممكن يقولوا اية لو شافوكى كدة؟ ولا هى حرية كدة و كدة زى اللى فى بطنك دة؟"

ساد الصمت و محدش اتكلم لمدة كبيره و كل واحد فيهم مشى فى طريق ..

عدى اسبوعين .. و رجع كل واحد منهم لعقله .. "طاهر" ساب الفرقه و ابتدى يدور على شغل .. و قص شعره ابتدى يلبس قميص و بنطلون عادين ..

"ناهد" بقى خلاص اقنعت صاحبها بالجواز .. و ابتدت تذاكر علشان تنجح فى الجامعة .. اما "جمال" فساب افكار الشيوعية و ابتدى يركز فى دروسه و يحاول يتخرج من ثانوى بعد اربع سنين سقوط اعتراضاً على توجه الدولة!

و الاب جمعهم كلهم "أنا فخور بيكم فعلاً .. اهو كدة تبقوا محترمين .. القصة عمراها ما كانت فى ان الموضه كدة .. القصة انت عايز ايه فى حياتك؟ الحرية؟ كلنا عايزين نعيش احرار بس القوانين اللى بتنظم حياتنا مش كبت للحرية .. القوانين اتعملت علشان تحط معاير للحرية .. و تعاقب اللى بيحاول ياخدها مننا .. اهو انتوا كدة فعلاً احرار .. بس من غير شعر طويل و حمل كدة و كدة و افكار متتطرفه .. أنا فعلاً فخور بيكم" .....

اضواء ... 2

ظل يفكر الشاب الصغير .. كيف سيجمع مبلغ عشرة جنيهات؟ هو ليس بالمبلغ الهيّن انه يحتاج لأكثر من ثلاث سنوات حتى يجمع هذا المبلغ ....

فكر فى ان يعمل اعمالاً اضافيه .. يمسح احذية على المقاهى .. يعمل جارسون فى كافيتريا الجامعة .. و يغسل الصحون ليلاً فى مطعم .. و يبيع البالونات و الورود و السعادة المجانيه للناس ...

جمع بعد شهرين من الاعمال الشاقة فقط ثلاثة جنيهات .. انه يحتاج حوالى سته اشهر لكى يُكمل المبلغ .. و هو لا يعرف كم هى المدة التى سيبقى الطبيب يجرى فيها العمليات بهذا السعر الرمزى .. هو يريد حلاً اسرع من هذا ...

يسير وحيداً فى الطريق حائراً لا يعرف ماذا يفعل؟ ظل يفكر و يفكر .. و فجأة رأى شابٌ فى العشرينيات من عمره يظهر عليه الثراء .. يتعرض للضرب من قبل لصين يريدان سرقته .. ركض سريعاً و صاح بهم "اوعى ياض انت و هو .. امشوا من هنا" و امسك حجراً من الارض و رماه فى اتجاههم .. فركضوا كالفأران ...

ذهب هو و امسك بالشاب الثرى قبل ان يقع على الارض  .. علم ان الشاب كان مخموراً .. قال له "أنت ايى اللى عمله فى نفسك دة بس يا باشا .. و لية تمشى فى الامكان البطاله دى؟" .. رد عليه و هو يتلعثم فى كل كلمة "عايز اروح .. أ .. أأأأأ .. أفوق" .. يمسك به الشاب و يرفعه ليقف على قدميه "قوم معايا .. قُلى بيتك فين و انا اوصلك .. انت متدهول مش شايف قدامك .. الله يخربيت الخمرة واللى بتعمله فى الناس .. قوم" .. يتعكز عليه الشاب الثرى و يمشى معه ....

بعد وصولهم إلى المنزل .. القى الشاب الفقير بالشاب الثرى على الاريكه و قال و نظرات التعب تعلو وجهه "اووف تعبتنى يا أخى .. لما انت مش قد الشُرب و السُكر بتسكر لية؟" ... رد عليه الشاب الثرى و هو يتمايل برأسه فى الهواء "عايز انسى هممووووومى عايز ... عااااايز انسى كل حاجة" .. نظر لية الشاب الفقير نظرة استنكار و تعجب "همومك؟ هموم اية بس اللى بتقول عليها دى؟ أنت عايش فى بيت اكبر من الحارة اللى انا عايش فيها! و تقولى هموم؟" ....

نظر له الشاب الثرى و هو يحاول ان يُثبت رأسه و يحاول فتح عينيه "أنت شايف البيت دة كله؟ ااااهو انا البيت دة عايش فيه لووووحدى .... من غير حد يسأل عليا .. من غير حد اهتم بيه و يهتم بيا .. مفيش غير خدم و طردتهم كلهم .. مليش حد فى الدُنيا .. ابويا الباشا و امى ماتوا و سابولى ككككككككل اللى انت شايفه دة .. لكن مع ذلك مش حاسس بطعم الدنيا .. مش حاسس ان فى حد يسأل عليا" .. سكت قليلاً ثم نظر له "انت من النهاردة صديقى الجديد .. انت اكتر واحد مهتم بيا" .. رد عليه بتهكم "صديقك .. ايش جاب لجاب؟ دة انا يا دوب اكون خدام عندك فى البيت دة!" ..

يقف على رجليه يترنح قليلاً ثم يثبت "لا *بصوت عالى* انت هتبقى صديقى الجديد و هسبتلك دلوقتى .. اطلب اللى انت عايزة و انا اديهولك عايز اية؟ قول!!" .. لمعت عين الشاب الفقير فجأة و كأنه وجد مصباح لص بغداد و ستحقق له احلامه كلها .. سيطلب منه الف جنيهاً .. لا بل الفان .. و لكنه سرعان ما اعرض عن هذه الفكرة و قال فى نفسه "أنا ميصحش اعمل كدة و هو متدهول للدرجة دى .. أنا استنى معاه لحد الصبح و بعدين اطلب منه" ....

ظل الاخر يردد "قول .. عايز كام؟ قول متتكسفش و متخافش قول" إلى ان سقط على الارض مغشياً عليه و هو يحاول الوصول إلى الخزنه ... و نامو حتى الصباح ...

و فى الصباح عندما اشرقت الشمس .. استيقظ الشاب الثرى اولاً و وجد نفسه بملابسه من الليلة الماضية .. و صاح بصوت عالى "يا اسماعيل يا متولى انتوا فين يا بهايم؟" .. فاستيقظ الشاب الفقير خائفاً "اية مالك؟ حصل اية؟" .. رد عليه الاخر فى خوف و ارتعاش "أنت مين؟ أنت حرامى؟ لو حرامى خد اللى انت عايزه و سيبنى و امشى" .. رد عليه بتعجب "حرامى! أنا اللى انقذتك ليلة امباح من المجرمين اللى حاولوا يسرقوك و جبتك لحد هنا قوام نسيتنى؟ اخص عليك ميتمرش فيك" .. نظر له الشاب الثرى و قد ظهرت عليه علامات الغضب "امشى اطلب بره بيتى امشى أنا معرفش الاشكال دى امشى" ...

خرج الاخر و على وجهة علامات الغضب و الحسرة "معدوم الضمير و سكرى .. انا كنت اخدت منه الفلوس امبارح و مشيت .. يعنى و هو سكران بيعاملنى زى صاحبه .. و هو فايق فاكرنى حرامى .. يا ريتنى شربته على الصبح و اخدت منه الفلوس"

يسير فى الشوارع .. ما زال يفكر فى حل يوفر به المال المطلوب .. و هو يسير وجد امامة اعلان مكتوب عليه "مسابقة للجرى مسافة 200 متر و الفائز فيها له جائزة قدرها عشرة جنيها للمركز الاول .. و سبعة للمركز الثانى و خمسة للمركز الثالث .. على من يريد التقدم للمسابقة الوصول الى النادى فى الحى المجاور" .. قال فى نفسه الشاب "اما حته صدفة انا اروح اشارك فى المسابقة و اكسب و اجمع الفلوس علشان تعمل العملية" ...

ذهب إلى النادى .. و شارك فى المسابقة و هو يعرف انه سريعاً .. و لكن كان هناك شاب طويل يقولون انه بطل الجرى لهذة الفئة .. لم يعره اهتماماً .. بدأت المسابقة .. ركض الشاب الفقير مسرعاً و يلاحقه هذا الشاب الطويل بسرعة رهيبه .. اصبح الفارق بينهما قليلاً جداً .. يركضان بسرعة فى محاولة للفوز بهذة المسابقة و نيل العشرة جنيهات .. تخطاه الشاب الطويل و لكن سرعان ما لحقه الشاب الفقير .. هل يفعلها و يفوز؟ .....

أخيراً وصلوا إلى خط النهاية متقاربين جداً .. عبروا خط النهاية تقريباً معاً .. لم يعرفوا من فاز .. لكن جاء قرار الحكم بأن الشاب الطويل بطل الجرى قد فاز .. لم يحزن الشاب الفقير لانه حصل على مبلغ السبع جنيهات هذا المبلغ يمكنه من اكمال الثلاثين جنيهاً لكى تجرى الفتاة التى يحب العملية ..

ذهب سريعاً إلى منزله و جمع الثلاثون جنيهاً و وضعهم فى صندوق و معهم الخبر بعنوان الطبيب و وضعهم امام بيتها و ركض بعيداً .. خرجت الام تتفقد ما هذا .. اعتلت وجهها ابتسامة و فرّت من عينها دمعة تدل على الفرحة .. اخيراً سوف ترى ابنتى الحبيبة الضوء ...

فى اليوم التالى ذهبوا للطبيب .. و اعطاهم ميعاداً لكى يجرى لها العملية .. و بالفعل جائت فى اليوم المحدد لها و اجرى لها العملية .. كانت صعبة عليها و على الاسرة و لكن الاصعب كان يوم ان ازال الطبيب العصبه من على عينها .. كانت تحاول فتح عينها و ترمش بهم كثيراً .. تغطى عينها من شدة الضوء بالنسبة لها .. أول مرة ترى الضوء .. رأت أبويها اخيراً .. ميزتهم من رائحة المسك و العنبر .. رأتهما يبكيان و يضحكان فى نفس اللحظة .. و هى تبكى و تقول "أخيراً شوفتكوا انا كان متهيألى انى هموت من غير ما اشوفكوا" .. ينفجروا جميعاً بالبكاء فرحاً برجوع النظر إلى ابنتهم .. و يغادرون العيادة ....

يسير الشاب الفقير فى الطريق كعادة .. فى يوم مشمس و لا يعرف حتى أين يذهب .. جلس عند محطة الحافلات من شدة التعب و الحر .. و جلست بجانبه شابه جميلة .. لم يراها كان قد وضع جريدة على عينه من شدة سطوع الشمس و ضوئها .. سمع صوت شئ يقع على الارض .. لقد وقع منها كتابها التى كانت تمسك به و وقعت منه وردة .. التقتت هى الكتاب و التقت هو الورد و رفع وجهه ليجد انها هى .. هى الفتاة التى احبها من كل قلبه .. انها هى بالفعل تنظر له و لا تعرفه ....

اعطاها الوردة و قالت له "شكراً" و لكن عندما لامست يده و قبل ان تسحبها .. علمت انها لمست هذة اليد من قبل .. و نظرت له و فى وجهه ابتسامة بلهاء كأبتسامة طفل وجد لعبته المفضلة .. نعم .. نعم تذكرت .. انها تلك اليد التى اعطتنى الوردة و البالونات .. كيف يمكن ان انسى اغلى هدية فى حياتى .. كيف يمكن ان انسى هذا الولد الكريم ..

نظرها لها و اشار على عينيه ثم لها و قال و الدموع تنهمر بغير قصد منه تفضح ما بداخله من سعادة لا توصف و قال "شايفانى؟" .. فردت عليه بأبتسامة مريحه و قالت "مش شايفه غيرك" .. لم يتمالك نفسه من البكاء .. بكى و هو سعيد .. لقد ابصرت من خطفت قلبى بدون ان تنظر لى .. لقد احبها اكثر من اى شئ و ضحى بكل ما يمتلك من اجل تلك اللحظة الثمينة .. يا الله .. لم يشعر بهذة السعادة من اللحظة التى اعطاها الوردة و البالونات ...

فلم يكن منها الا ان ابتسمت و قالت له "أنت مبقاش معاك بالونات؟ تيجى معايا نروح نشترى؟" .. لم يرد فقط اشار برأسه بالموافقة .. نعم اريد ان اذهب معكِ اينما تذهبين .. ستكونين انتِ حياتى القادمة .. فقط .......

أضواء ... 1

كان ياما كان ...

كان هناك فتاة صغيرة مفعمه بالحيوية تحب اللعب كثيراً .. كان ابويها طيبان و يرعيانها افضل رعاية .. و لكن الله ابتلاها من ولادتها بالعمى .. فلم تكن تعرف شكلها ولا اشكال من حولها .. كانت فقط تعرفهم من رائحتهم او ملمسهم .. رائحة ابويها كانت المسك و العنبر بالنسبة لها .. و رائحة منزلها كانت رائحة الورد ....

فى يوم من الايام اخذاها للحديقة فى يوم عيد ميلادها لتلعب مع ابناء جيرانها و ابناء اصدقاء ابويها .. لعبت كثيراً حتى احست بالظمأ .. تريد شرب كوباً من الماء ليرويها حتى تستطيع ان تُكمل اللعب .. ذهبت بعصاها إلى احواض المياة  ...

هناك كان يقف فتى صغير .. بائع البالونات و الورود .. يرتدى جاكيت بدلة مهترء قديم اكبر من حجمة يبدوا كمعطفٍ .. و يظهر على وجهه ابتسامة جميلة مُشرقة ..

جاءت هى لتشرب الماء .. كانت تغسل الكوب فرمت بعضاً من الماء عليه .. فلم يكن منه الا انه وخزها فى كتفها .. فقالت بكل لطف و هى تنظر ناحيته "أنا اسفه مشوفتكش .. أنا اسفه لو جت عليك حاجة مش قصدى" ...

عرف انها كفيفه لا ترى .. لم يقل شئ بل ابتسم و امسك بيدها و اعطى لها ورده و بالونه .. فقالت له "دول ليا أنا .. شكراً" و اكملت فى برائه و تلقائيه "أنت تعرف ان النهاردة عيد ميلادى؟ و بابا و ماما جابونى هنا علشان العب و اجرى" و ابتسمت ابتسامة جميلة ...

فما كان منه الا ان ابتسم و اعطى لها جميع البالونات .. فقالت له "شكرا ليك انا بحبك اوى .. دى احسن هديه جاتلى" .. شعر لأول مرة بقلبه يخفق .. و كأنه يطير فى السماء .. يرى الدنيا كلها ورود و بالونات و فرحة .. كانت سعادة بوسع السماء ...

أخذت منه البالونات و كانت تسرع خطاها لتذهب الى ابويها .. تملؤها السعادة و الفرح .. أحست بالفعل انه اجمل يوم فى حياتها ..

وقف الشاب ينظر لها و هى تمشى .. و لم يلتفت إلى انه لم يعد لديه ما يبيعه سوى بعض الورود .. ولكنه لم يكن حزيناً ..

بعد أنهاء اليوم ذهب كل منهم فى طريق .. هو إلى بيته الصغير مع اخوته الاربع .. و هى الا بيتها الكبير كانت لا تزال ممسكة بالبالونات و هى نائمه فى سريرها ..

مرت الايام .. و اصبح والدها غارقاً فى الديون بسبب انه تشاجر مع مديره فى العمل لانه كان لصاً .. فكان جزائه ان طرد من العمل و اصبح بلا عمل .. باع المنزل الكبير و ذهبوا جميعاً ليعيشوا فى منزل عائلتهم القديم الصغير ..

اصبحت الفتاة لا تشعر بالسعادة .. اصبحت تشعر ان الدنيا قد ضاقت .. و انه لم يكن بوسعها السعادة مرة أخرى ..

كانت تسير فى الحارة الصغيره مع والدتها .. فرأها الفتى الصغير بائع البالونات .. لم يصدق انها هى .. وقف يراقبها من بعيد و هى تمشى و على وجهها تعاسة تجعلها كأنها فى الخمسين من عمرها .. كانت على وجهه ابتسامة اختف سريعاً و قد حزن لرؤيتها هكذا ...

فى يوم من الايام سمع احد الجالسين على المقهى يقول "تعرف يا سعيد افندى انهم لقوا علاج دلوقتى للعمى؟ أنا مذهول" يرد سعيد افندى "بس دة تلاقية غالى اوى يا محمد افندى" .. ينظره له محمد افندى "لا ولا غالى ولا حاجة .. مكتوب ان الدكتور اللى بيعالج عاملها بسعر رمزى 30 جنية فقط" يتعجب سعيد افندى "30 جنية بس .. والله يا بلاش .. و فين عيادة الدكتور دة بقى ان شاء الله؟" يرفع محمد افندى نظارته و يدقق فى العنوان "اهو شارع عزبة النخل نمرة 4 عيادة الدكتور عبد البصير" .....

يجرى الفتى و كان قدماه لا تلمس الارض فرحاً .. لقد وجد حلاً سيسعد الفتاة التى قالت انها احبته .. و لكن كيف سيجنى الثلاثون جنية و هى لم يدخر غير عشرين جنية طيله حياته؟

يُتبع ....

الخروج من باب الدنيا "حلم ولا علم؟" .....

مبقاش حاسس بطعم الاكل .. كل حاجة فى الحياة حوليه بقت ممله .. نفس الروتين اليومى لا يتغير .. حاسس ان حياته مبقاش ليها معنى .. اهله كل يوم فى خناق معاه .. خطيبته سابته .. اصحابه و مبقوش يسألوا عليه و لا يكلموه زى الاول ...

حياته اتغيرت من ساعة ما عرف انه مصاب بمرض نادر .. مرض لسة ملوش علاج .. كلام الدكتور ليه كان ان الطب بيتقدم كل يوم و ممكن يكون فى امل .. كلمة امل بالنسبة له بقت عاملة زى الافلام الهندى القديمة او افلام الخيال العلمى .. اى كلام يعنى ...

فى يوم قرر انه ينهى حياته بأيد و ميستناش الموت هو اللى يروح للموت .. جاب ملايه السرير و ربطها فى مسمار فى السقف .. و جاب كرسى و لف الملايه حولين رقبته .. زق الكرسى من تحت رجله .. الملاية خنقت على رقبته .. قعد يرفس فى الهواء .. نفسه اخر نفس يطلع و ميدخلش .. من كتر الحركة الملايه اتقطعت وقع على الارض اغمى عليه .....

فتح عينه لقى نفسه فى مكان غريب .. شجر و بير مياه .. و فى راجل كبير واقف عند البير .. بلحيه كبيرة و شبه السحره اللى بيبقوا فى الافلام .. و ماسك عصايه فى ايدة ..

الشيخ شافه و بدأ يقرب له .. الشاب خاف و بدأ يقلق .. "اية المكان دة و اية اللى جابنى هنا؟" قالها الشاب للشيخ ..

-الحكيم: أنا كنت لسه هسألك نفس السؤال .. انت اية اللى جابك هنا؟

-الشاب: مش عارف .. أنا كنت .....

-الحكيم: كنت اية؟

-الشاب: كنت بحاول انتحر علشان زهقت من الدنيا دى .. عايز ارتاح بقى.

-الحكيم: و مين قالك انك هترتاح؟ هو انت تعرف اية اللى مستنيك بعد الموت؟

-الشاب: أكيد اى حاجة هتكون احسن من العيشه اللى أنا عايشها فى الدنيا دى.

-الحكيم: دة مجرد شك مش أكيد .. مينفعش تموت نفسك علشان مجرد شك.

-الشاب: و كنت عايزنى اعمل اية يعنى؟

-الحيكم: تصبر ...

-الشاب: صبرت كتير و زهقت.

-الحكيم: اصبر لحد بكرة.

-الشاب: بكرة هيكون اوحش من النهاردة.

-الحكيم: و أنت تعرف منين؟ هو انت اللى خلقت الايام؟

-الشاب: لا .. بس دة اللى انا عايش فيه .. سواد.

-الحكيم: طيب ازاى تحكم على حاجة انت مبتتحكمش فيها؟

-الشاب: دة عمرى و أنا حر فيه.

-الحكيم: بس أنت مخلقتش نفسك علشان تتحكم فى عمرك.

-الشاب: أنت عايز منى اية؟

-الحكيم: مش عايز منك حاجة .. عايزك بس تفكر .. طالما انه مش عمرك .. يبقى ممكن اللى خلق عمرك يحسنه.

-الشاب: أنت هتوجع دماغى .. أنا عايز اموت.

-الحكيم: حتى و لو كان اللى مستنيك بعد الموت هو الجحيم؟

-الشاب: يا أهلاً بالجحيم .. هو فى جحيم أكتر من اللى أنا عايش فيه.

-الحكيم: واضح انك معندكش تصور للجحيم غير انه الجوع و الفقر و الحر و شوية تراب هتنفضهم و خلاص .. الجحيم اللى مستنيك حاجة اكبر من كدة .. حاجة لو شُفتها هتقول ياريت ارجع لحياتى تانى .. للاسف أنت اعمى مش شايف غير اللى تحت رجلك.

-الشاب: *وشة احمر و زعق بصوت عالى* أنت مش فاهم حاجة .. مش حاسس بحاجة .. أنا خلاص مبقاش ليه عيشه فى الدنيا دى .. دنيا كلها وجع و كذب و نفاق .. كلها مرض و جوع و عذاب .. دنيا بالشكل دة تتعاش ليه؟ و فى الاخر تقولى اعمى؟ أنت اللى اعمى .. أنا هموت يعنى هموت و محدش هيقدر يمنعنى .. هموت يعنى هموت أنت فاهم ...

-الحكيم: كل شخص بيتحمل نتيجة اختياره .. موت جحيمك فى انتظارك ...

أختف الصورة من قدامه .. فتح عينه لقى نفسة فى المستشفى و صوت طبيب .. حمدلله على السلامة .. انكتبلك عمر جديد .. و مشى الدكتور .. لقى علبة دواء جنبه .. مستناش ثانية يفكر تفكير تانى .. فتحها و اخد كل الحبوب اللى فيها .. و مات ....


تانى يوم .. خطيبته و اصحابه جُم يسألوا عليه .. اصلهم قرأوا خبر على النت مكتوب فيه انهم أكتشفوا علاج لمرض صاحبهم- الله يرحمه- و كانوا جاين علشان يبلغوه .. كان هو خرج .. من باب مفيش منه دخول .....


متستعجلش .. اصلها مش بأيدك ولا بأيدى .. ما تتمناش حاجات انت مش قدها .. اسعى انه يكون بكرة احسن من النهاردة حتى لو مش شايف دة .. نتايج اختيارك انت اللى بتتحملها مش حد غيرك .. حافظ على كل شئ غالى فى حياتك "عيلتك .. اصحابك" .. حاول بس تفكر قبل ما تتمنى .....

القسيس و الجميلة المُطلقة ...

يحكى أن .. هناك قصة كان ابطالُها قسيس و إمرأة جميلة مطلقة و وحيده .....

زمن القصة مجهول ...


كان القسيس و المرأة جيران .. كان كل يوم يعدى عليها و يقرأ موعظة دينية علشان يحميها من الخطيئة .. كان خايف عليها فعلاً من جمالها و من الرجال اللى حواليها ...

و فى يوم دخل عليها لقيها بتحضر شنطتها و مسافرة .. سألها رايحة فين؟ قالتله عايزة ابعد شوية .. ابعد عن المكان دة شهرين مفيش غيرهم ...

قالها قبل ما تمشى "استنى أنا جايبلك هدية" .. راح و رجع فى ايدة جمجمة .. جمجمة ميت من غير سنان و متكسرة .. خافت اترعبت .. اية الهدية دى؟ حد برضه يجيب هدية جمجمة و متكسرة؟!

قالها " بصى على الجمجمة كويس و بعدين بصى لنفسك فى المراية .. ورا الجلد الجميل دة و الشفايف الحُمر دول و العيون الزرق الصافيين زى يوم من غير غيوم .. كل دة وراه الجمجمة بالشكل دة .. كلنا فراغ .. وهم .. لينا وقت و هنزول و مش هيفضل مننا غير الجمجمة و العضم دة .. الدنيا كلها وهم .. بلذتها بلحظاتها الحلوة وهم و مش هيفضل للانسان فيها غير السُمعة الطيبة و العمل الصالح"

كمل كلامه " كل لما تحسى فى نفسك بالغرور و الزهو .. بصِلها .. و هتشوفى قد اية ان الدنيا متستهالش نضيع لحظة واحدة من غير ما نفرح فيها"

اخدت الجمجمة و سافرت .. و رجعت بعد شهرين و كان هو فى انتظارها .. سألها عملتى اية فى الوقت دة؟

هى قالت و كان باين عليها السعادة "ابونا انا مش هكدب عليك .. انا قضيت الايام دى بكل حكمة و افتكرت كلامك كله .. كنت كل يوم ابص فى المرايه و ابص على الجمجمة و اتحسر على ان الجمال دة هيروح من غير ما استمتع بيه ...

فقررت .. اقضى كل يوم من الستين مع راجل مختلف .. علشان اتمتع بجمالى و ميكونش مصيرى فى الاخر جمجمة"

وكانت اخر كلمات للقسيس قبل ما يغمى عليه "حسبى الله و نعم الوكيل ...."