‎"وَمَا هَذِهِ الْحَيَاةُ الدُّنْيَا إِلَّا لَهْوٌ وَلَعِبٌ وَإِنَّ الدَّارَ الْآخِرَةَ لَهِيَ الْحَيَوَانُ لَوْ كَانُوا يَعْلَمُونَ" .. يعنى انا نازل الدنيا علشان العب و الهو؟

بعد صلاة الجُمعة-نفعكم الله بأجرها- سمعت بالصُدفة سورة العنكبوت و بصراحة اول مرة اركز فيها كدة .. فى اخر خمس او ست ايات كدة جت الاية اللى مكتوبة فى العنوان ....

قُلت اية دة؟ يعنى اية؟ يعنى الدنيا دى كلها لعب و لهو؟ ازاى يعنى امال انا فى الدنيا بعمل اية؟

بعد ما بحثت و قرأت تفسيرات مختلفة لقيت ان مش هو دة المقصد من الاية الكريمة .. لقيت ان المقصد هو انك تعمل اى عمل بس يكون موجه لله ..

تخلي الله مركز الحياة .. لأن كل عمل بتعمله لله بتُأجر عليه فى الدنيا و الاخرة و يبقى عند الله الى يوم القيامة ..

عملك الطيب يبقى عند الله "إِنَّا لا نُضِيعُ أَجْرَ مَنْ أَحْسَنَ عَمَلا".

انت مش نازل الدنيا تلعب .. انت نازل تجرب .. نازل تشوف خلق الله فى الكون .. و تتعامل مع متغيرات الحياة .. و تتعايش مع ناس مختلفين معاك فى الفكر و العقيدة و اللون و اللغة.

الدين مش بس صلاة و صوم و عبادات .. الدين معاملة.

انت نازل الدنيا .. تعمل للاخرة .. لأن الدنيا ليها نهاية .. ليها وقت و هيكون مفيش دنيا .. و الاخرة هى الاساس .. هى الحياة الكامله هى اللى مش هتسمع فيها كلمة "موت" ...

ابدأ بنفسك .. طوّر و غير من نفسك للاحسن "وَأَحْسِنُوا إِنَّ اللَّهَ يُحِبُّ الْمُحْسِنِينَ".

دور على هدف ليك فى الحياة يقربك من الله .. أشتغل و اجتهد و اوصل لهدفك .. بس خلى فى النهاية هدفك ارضاء الله و دخول الجنة .. لانها فى النهاية هى الابقى.

فكر فى الاخرة .. لأنها تستحق :)