بسم الله الرحمن الرحيم نبدأ سنة جديدة بس عايزها سنة سعيدة؟

كل سنة و انتوا طيبين و هابى نيو يير و الجو دة! ....

بعد ما قولت لاصحابك كل سنة و انتوا طيبين و كدة و دعيت لهم بدعوة حلوة فكرت تعمل حاجة مختلفة؟! مثلاً انك تكتب اللى نفسك تغيروا فى نفسك؟ او انك تكتب عن كل حاجة حصلتلك فى السنة اللى فاتت اتعلمت منها حاجة جديدة؟

جربت تتفائل و تقول ان التغير مش هيتم غير لما انا اغير نفسى؟

مش هقولك نفس الكلام اللى بيقوله بتوع التنمية البشرية و خد خطوة و امشى لقدام و اكسر يمين و جو بتوع الباركنج دة! D:

لكن هاقولك هات ورقة و اكتب فيها العادات اللى نفسك تغيرها فى شخصيتك .. كلنا مليانين اخطاء و بلاوى منيله و عُقد بقى و نفسيه و كل حاجة .. الذكى اللى يعرف يحسن من نفسه بدل ما يقعد يحاول يعيش كويس و ما يركزش مع عيوبه بس!

جرب مثلاً تلعب رياضة (و الكلام لنفسى قبل ما يبقى لحد تانى) حتى و لو ربُع ساعة فى اليوم اهى دى عادة مش ممكن تندم عليها.

جرب تفتح المصحف اللى غطاة التراب و تقرأ فية كل يوم مش هاقولك جزء او حزب حتى بس اقرأ 10 أيات اكيد هاتفرق معاك.

جرب تبطل تكره حد لمجرد اختلافة معاك فى الرأى .. جرب تحترم عقل اللى قدامك حتى لو انت شايف ان كلامه غلط 100%.

جرب ما تسخرش من حد لمجرد انه معرفش يعمل الحاجة اللى انت عملتها .. يمكن هو موهبته مش فيها .. يعنى من اللى اخر ماينفعش تسخر من سمكة علشان معرفتش تطلع على الشجرة .. اصله مش شغلها!

جرب ما توعدش الناس و تخلف .. اصدق مع الناس فى المعامله .. ما تديش مواعيد لأصحابك و توصل بعدها بنص ساعة و ساعات أكتر من كدة D:

جرب تقرأ لو ماكنتش بتقرأ .. حتى لو ما افادتكش مش هتضرك صدقنى.

جرب مش هاتخسر .. جرب تغير حياتك بنفسك .. جرب و فكر و ابحث و اجتهد و هتلاقى حياتك اتغيرت .. بس جرب.

اقولكوا تانى كل سنة و انتوا طيبين .. و يارب السنة دى كل واحد فينا يغير نفسه للاحسن حتى و لو فى حاجة صغيرة بس هاتفرق معاه بعدين .... :)

"وَلَسَوْفَ يُعْطِيكَ رَبُّكَ فَتَرْضَى" ... لية؟

اولاً و قبل اى حاجة احب اقول ان سورة الضحى من احب السور الى قلبى .. فيها معانى كتير حلوة و اوامر تمشى عليها لانها هاتنفعك زى 

"فَأَمَّا الْيَتِيمَ فَلا تَقْهَرْ وَأَمَّا السَّائِلَ فَلا تَنْهَرْ وَأَمَّا بِنِعْمَةِ رَبِّكَ فَحَدِّثْ" ...

لكن لفت نظرى الأية اللى بتقول "و لسوف يعطيك ربك فترضى" .. الأية دى اتقالت لرسول الله صلّ الله عليه و سلم و معناها ربنا هايعطيك اللى هاتطلبه فى امتك و الرسول طلب الشفاعة :)

اما لينا احنا فسألت لية ربنا قال "و لسوف يعطيك ربك فترضى" طب ما ممكن الحاجة اللى ربنا يديهالى دى ماتعجبنيش ...

لقيت نفسى بتكلم من منظور ديق جداً الرضا هنا مش لما تجيلك النعمة تعجبك او ما تعجبكش .. الرضا انها جتلك اصلاً لما تبص لغيرك تلاقيه يتمنى النعمة اللى جتلك على طبق من دهب ...

كلنا كابشر مش كاملين و فينا تناقضات و اختلافات كتير و نواقص .. بس كل واحد فينا عنده مميزات و الذكى مش اللى يحاول يلغى النواقص اللى عنده .. الذكى اللى يعرف ازاى يستفيد من المميزات ...

و اول حاجة ممكن تعملها لما تلاقى المميزات دى انك تقول الحمد لله و ساعتها تفهم معنى الأية العظيمة "و لسوف يعطيك ربك فترضى" :)

الكلمة السحرية لجعل الخطأ يبدوا صحيحاً "يعنى هى جت عليا انا؟"

"يعنى هى جت عليا انا؟" كلمة سحرية بتبرر لكل اللى بيعمل حاجة غلط انه صح طالما غيره بيعملها و مابيحصلوش حاجة!

يعنى مثلاً; تلاقى شلّة واقفين بيشربوا سجاير او قاعدين على كافية بيشيشوا *عادى* يجى صاحبنا يقعد معاهم "اية الاخبار عملين اية يا رجالة؟" يرد صاحبة "اية يا نجم؟ لسة صدرك بيوجعك من الشيشة ياد خد شدلك نفسين استرجل!" *و مش فاهم اية علاقة الرجولة بالشيشة!!

يجى صاحبنا بقى يكلم نفسة "طب و فيها اية يعنى لما اشدلى نفسين ما الناس كلها اهى حواليا بتشرب و مابيجرلهاش حاجة .. يعنى هى جت عليا انا يعنى" و يشد صاحبنا و بعد النفسين يفرح انة كدة بقى راجل قدام صحابه لكن نسى صاحبنا انة بقى عيل قدام نفسة و الانفاس اللى بيشدها دى ملهاش اى تلاتين لازمة غير متعتة هو الشخصية و احساسة بالرجولة المزيفة.

يوم العيد و بعد الصلاة صاحبنا كالعادة راحت علية نومة و مانزلش يصلى .. كلمة صاحبة "الو .. اية يا سديقى ما تيجى معانا احنا نازلين وسط البلاد نظبطلنا كام مزّة استرجل فى مرة و تعالى معانا" اكيد ردة هايكون انة ينزل معاهم.

صاحبنا راح لقاهم كل بنت تعدى من جنبهم يعاكسوها و يمشوا وراها و يتحرشوا بيها سواء بالالفاظ او باللمس .. و كالعادة عمل زيهم علشان مايقولوش علية "غلبان و على قده" و الكلمة السحرية فى دماغة "يعنى هى جت عليا انا؟" صاحبنا حس بالفرحة و حس انة عمل بطولة .. لكن اللى ميعرفوش انه خان رجولتة اللى بيها لازم يحافظ على اللى حواليه سواء بنات او رجالة يحمى البنات من اصحابة و يحمى صحابه من انفسُهم الضعيفة ..

امثلة زية كدة بقى كتير اللى يخرج من مكان بهمجية و يزق اللى جانبة و يقع و يقولك "يا بية يعنى هى جت عليا انا؟"

اللى يحرق زبالة فى الشوارع و يضر بيها الناس و يقولك "ما كل الناس بتعمل كدة يعنى هى جت عليا انا؟"

اللى يكسر اشارة و يرمى زبالة فى الشارع و غيره و غيره امثلة كتير بس بصراحة مش عاوز اوجع دماغنى انى افكر فيها .. كفاية كدة انا زهقت. 

العلم .... نور للعقل و البصيرة حتى و لو سنك 70.

نمت امبارح و فاتنى حاجتين مهمين جداً .. لا عرفت مين اللى فاز فى برنامج The Voice ولا اتفرجت على حلقة باسم يوسف الجديدة .. بس كل دة و لأول مرة فى حياتى مايهمنيش و مايفرقش معايا لأنى حسيت ان حياتى ليها هدف غير انى اتفرج على التليفزيون او اقعد على النت.

نزلت من البيت امبارح يوم الجمعة الساعة 7 اتجمعنا انا و مصطفى على و مصطفى شبل و الباشمهندس محمود و وصلنا الحصرى و قابلت دكتور خالد و بهاء عطوة و كان فى ناس كتير تانية واقفين .. كان فى اماكن كتير ممكن نروحها زى ابو النمرس و البدرشين و سقارة و غيرهم .. بعد ما استقرينا على سقارة كنت فاكر بصراحة انى هاشوف بقى الاثار و السياح و Welcome in Egypt يا خواجة و الجو دة .. لكن اول ما وصلنا شفت مكان مظاهر الفقر موجودة فى كل مكان-الا مارحم ربي-من قمامة لصرف صحى لبيوت مهدومة .. المدارس كانت جديدة فى المكان و دة معناه ان التعلم لسة داخل سقارة من قريب بس .. على رأى باشمهندس محمود: "هو المكان دة فى مصر يا جماعة؟".

كان التعامل معانا من كل الموجودين فى المكان على اننا سُياح و مش من هنا و استغربت الناس بتبصلنا كدة لية؟ اية الناس الغريبة دى؟ هاتعرفوا بعدين لية كانوا بيبصولنا .. المهم بعد الصلاة رحنا جمعية الامام على و استعدينا و كل واحد اخد مكانه و مهمتة عبدالله حسنى بياخد اسماء الناس و ارقام بطايقهم و الباشمهندس محمود مراقب دور و  مروة كانت Leader او قائد باين مع اسماء على ما اظن بصراحة مش فاكر :) و سارة الشافعي و سارة أيمن و زينب و الاء و مصطفى على و مصطفى شبل و محمد حسام و بهاء عطوة و انا كنا مراقبين لجان .. انتظرنا لحد ما كملت اول لجنة و دى اللى راقب عليها كان مصطفى على .. فى البداية طبعاً كان كالعادة لازم يكون فى مشاكل مين نسى البطاقة و البيت بعيد و مين عايز يغش و مين بيسأل كتير.

بس كل دة انتهى بعد اول ربٌع ساعة و اكتملت لجان تانية و جيه دورى انى اراقب على لجنة .. ماكدبش عليكوا فى الأول كنت خايف مش عارف اراقب على ناس اكبر منى فى السن ازاى و اقولهم عيب و مايصحش و ماتغشش ازاى؟ بس اول ما بدأت لقيت كلهم عاوزين يحلوا و فى حماس انهم يعرفوا يحلوا الامتحان مع بعض المساعدات البسيطة عن طريقة حل الاسئلة .. 

بدأت بألاملاء زى ما قالت الLeader او القائد بتاعتنا اسماء :).

قطعة الاملاء بصراحة كانت تعتبر نسبياً طويلة بالنسبة لهم 4 سطور  و فيها كلامات صعبة زى "محركات" و "كهرباء" .. بس عدت على خير الحمدلله .. بداوا حل و كل واحد نفسه يكمل الورقة كلها و مايسبش فيها حرف .. مع بعض المساعدات فى العربى و الحساب خلصت اول لجنة بسلام و محصلش اى مشاكل الحمدلله .. احساسى بعد ماشفت حل بعض منهم فى الورق كان "ازاى الناس دى معهاش شهادة لحد دلوقتى؟ دول بيجاوبوا كويس جداً!!".

عرفت اكتر لما دخلت مع مصطفى على لجنة لان ساعتها كان شبل فى التوكتوك بينادى بالميكروفون فى البلد بعد ما بهاء خلص نص البلد و رجع .. اللجنة كان قاعد فيها ثلاثة-ست و راجلين-اللجنة دى كانت اكتر لجنة اثرت فيا لما شفت السيدة الفاضلة قاعدة ماسكه الورقة بتحل و وشها يكاد يكون لازق فى الورقة لان اللى عرفتوا بعد كدة ان نظرها ضعيف و هى كانت بتحل الامتحان من غير النظارة و هى بصراحة مجتهدة جداً فى الحل  و بتكتب بخط كويس و منظمة .. فى اللحظة دى عينيا دمعت لأول مرة علشان اول مرة احس قد اية الناس دى محتاجة العلم و انا جالى من غير طلب.

ساعتها قٌلت ان فعلاً العلم نور ينير العقول و البصيرة .. خرجت من لجنة دخلت فى لجنة تانية و بعدها خلصت و انا لسة عندى تساؤل واحد "هى الناس اللى فى البلد كانوا بيبصولنا لية؟" بعد ما نزلنا و اتجمعنا علشان نرجع وقفت مع ايمن-اللى فتحلنا جمعية الامام على الصبح- و عرفت منه ان الناس بيبصولنا مش علشان هما ناس غريبة لا علشان احنا اللى بالنسبة لهم غرباء .. "ناس جايين فى تجمع غريب و اول مرة نشوفهم جايين يعملوا اية؟" دة كان كلام اهل سقارة عننا عرفت انهم كلهم يعرفوا بعض و كلهم ناس طيبين و مش طالبين من رئيس ولا وزير ولا حتى نائب فى مجلس الشعب احلامهم بسيطة جداً عبارة عن جملة واحدة "يا باشا احنا عايزين بلدنا دى-سقارة- تبقى احسن و تتشال منها الزبالة".

عرفت ان انهم ناس طيبة مش زى ما كنت متصور انهم بلطجية و كلهم قتالين قُتلة و شبة فيلم ابراهيم الابيض .. لكن طلعوا ناس طيبين و احب اشكرهم على استقابلهم لينا و تشريفهم لينا فى الجمعية و حبهم للعلم حتى و لو بعد سنين من الامّية.

اليوم دة كانت استفادتى انا اكبر من اللى جُم امتحنوا .. لأن كل دة كان اول مرة اشوفه و اعرفه .. استفدت كمان من الناس اللى كنت معاهم حسيتهم اخواتى القادة بتوعنا اسماء و مروة مكانوش قادة من الى هما بتوع "روح على لجنتك" "حاضر يا فندم" و جو الامر و النهى دة بالعكس كانوا كويسين جداً فى التَعامُل معانا استفدت منهم كتير.

و احب اشكر كمان كل اللى كانوا معانا بالاسم واحد واحدة .. الباشمهندس محمود و بهاء عطوة و محمد حسام و مصطفى على و مصطفى شبل و مروة و اسماء و سارة ايمن و سارة الشافعى و الاء و زينب .. ربنا يكرمكم كلكم ان شاء الله :)

طولت عليكم انا عارف بس الموضوع بجد كان يستحق اكتر من كدة .. شكر خاص لمؤسسة صُناع الحياة علشان كانت السبب فى انى اغير من حياتى و كانت السبب فى معرفتى بكل الناس دى :)